Жаңа академия – жас таланттар

Қарағандыда балалар мен жасөспірімдерге арналған заманауи футбол академиясы ашылады. Енді өңірдің талантты ұл-қыздары кәсіби деңгейде жаттығып, болашағын үлкен спортпен байланыстыра алады. Жоба Қарағанды облысы әкімдігі мен Freedom Holding Corp. компаниясының бірлескен жұмысының нәтижесінде жүзеге аспақ. Тараптар ынтымақтастық туралы меморандумға қол қойды. Жаңа спорттық нысан аймақтағы футбол инфрақұрылымын дамытуға үлкен серпін береді деп күтілуде.

Облыс әкімі Ермаганбет Бөлекпаев бұл жобаға ұзақ уақыт дайындалғандарын айтты. Оның сөзінше, Freedom компаниясымен алты ай бойы келіссөздер жүргізілген. «Бұл әлеуметтік жауапкершілігі жоғары, бастамашыл серіктес. Бүгін біз маңызды қадам жасап «Шахтёр» футбол академиясын салу жөніндегі меморандумға қол қойдық. Біздің басты мақсатымыз балалар мен жасөспірімдер футболын дамыту. Сол үшін мемлекет пен жеке сектордың күшін біріктіруге дайынбыз. Бұл ауқымды жоба өңір тұрғындарына үлкен тарту болмақ», – деді облыс әкімі.

Freedom Holding Corp. бас директоры Тимур Турлов Қарағандының қазақстандық футбол тарихындағы ерекше орнын атап өтті. Оның айтуынша, Қарағанды – спорттық дәстүрі терең, рухы мықты аймақ. «Шахтёр» клубының еурокубоктағы жетістігі – соның айқын дәлелі. «Біз бұл академияны жай ғана спорттық нысан ретінде емес, жастарды дамытатын, Қазақстан футболының болашағына үлес қосатын маңызды жоба деп санаймыз. Академия болашақ таланттарды тәрбиелейтін орталыққа айналады деп сенемін. Өңірмен бұрыннан келе жатқан серіктестігіміз жаңа жобаның сәтті жүзеге асатынына сенім береді», – деді Тимур Турлов.

Академия халықаралық стандарттарға сай салынады. Жалпы ауданы 9 гектардан асатын аумақта үш толық өлшемді футбол алаңы, жылыту жүйесі бар жаттығу алаңы, жабық манеж, 3500 орындық жаңа стадион, интернат, әкімшілік және медициналық ғимараттар бой көтереді. Құрылыстың жалпы ауданы 28 мың шаршы метрден асады. Академияда тек спорттық дайындық емес, балалардың қауіпсіздігі мен сапалы білім алуына да ерекше мән беріледі. Нысан Майқұдық пен Оңтүстік-Шығыс шағынаудандарының ортасынан салынбақ. Жаңа академия «Шахтёр» футбол клубының негізгі базасына айналады және мұнда клубтың балалар мен жасөспірімдер және әйелдер лигасы да дамитын болады.

Ералы ҒАНИ,

«QH»