Жасырылған мүлік – енді әділ бөлінеді

Ажырасқаннан кейін мүлікті бөлу ережесі өзгерді: талап мерзімі жаңаша есептеледі. Қазақстанда ерлі-зайыптылар ажырасқан соң ортақ мүлікті бөлісу тәртібіне маңызды өзгеріс енгізілді. Бұдан былай 3 жылдық талап қою мерзімі ерлі-зайыптылардың ажырасқан күнінен емес, жәбірленуші жасырылған мүлік туралы нақты білген сәттен бастап есептеледі. Бұл туралы Қазақстан Конституциялық сотының жаңартылған қаулысында айтылған.

Өткен жылдың желтоқсанында Конституциялық сотқа ел азаматы шағым түсірген. Ол бұрынғы норманың Конституцияға қайшы екенін көрсетіп, егер бұрынғы жұбайы мүлікті жасырғанын ажырасқаннан кейін тек 3 жылдан соң білсе, өзінің заңды үлесін талап ете алмайтынын алға тартқан. Бұған дейін талап мерзімі ажырасқан күннен бастап есептелетін.

Сот азаматтың уәжін орынды деп танып, мұндай норма жеке меншікке деген конституциялық құқықтарды шектейді деген шешім шығарды. Енді ортақ некеде алынған пәтер, көлік, банк салымдары немесе өзге де активтер жасырылған жағдайда, оны білген күннен бастап азамат сотқа жүгіне алады.

Бұл өзгеріс туралы адвокат Илья Махлов былай дейді:

– Яғни, азамат өз мүлкіне қатысты құқығының бұзылғанын білген сәттен бастап, мысалы, мүлік сатылып кеткен, біреуге жалға берілген немесе табыс түсіп жатыр, бірақ ол табыспен бөліспейді – сол кезден бастап талап мерзімі есептеледі. Бұл, меніңше, ерлер үшін де, әйелдер үшін де әділ тәжірибе болмақ. Конституциялық соттың шешімі – заңды әрі орынды, – дейді ол.

Жаңа норма енді көптеген азаматқа өзінің заңды үлесін қорғауға нақты мүмкіндік береді. Ең бастысы – жасырылған мүлік туралы білген сәтті құжатпен дәлелдей алу қажет.

Құралай КӨБЕНОВА,

«QH»