BaiQymyz-да танылған «Қарыншы» қымызы

Астанада алғаш рет ұйымдастырылған ауқымды BaiQymyz гастрофестивалі қымыз өндірісіндегі үздіктерді анықтады. Еліміздің әр өңірінен келген фермерлер бұл алаңда 50 тонна бие сүтінен дайындалған өнімді ұсынды. Сарапшылар сапа мен технологияға қарай үздік қымыз өндірушілерді марапаттады.

Қарағанды облысы бұл байқаудан шет қалған жоқ. Қарқаралы ауданы, Тегісшілдік ауылындағы «Қарыншы» шаруа қожалығы фестивальдің жүлдегері атанып, екінші орынды иеленді.

«Қарыншы» қожалығы байқауға 900 литр қымыз, сонымен қатар сары май, құрт, жылқы және қой етін алып келді. 30 жылдан астам уақыт бойы жұмыс істеп келе жатқан қожалық өсімдік және мал шаруашылығын қатар дамытып отыр. Қазіргі таңда мұнда 800-ге жуық жылқы, 540 ірі қара, 3600-ден астам қой бар. Мал бордақылау алаңы құрылып, ірі инвестициялық жоба жүзеге асырылған.

Қарағанды облысының бірнеше аудандарынан келген өкілдер ұлттық сусынның сапасын танытып, өңірдің әлеуетін көрсетіп қайтты. Сарапшылар Қарқаралы қымызының жоғары сапасын ерекше атап өтіп, оны еліміздегі үздік өнімдердің қатарына қосты.

Сонымен қатар Қарағанды облысының Бұқар жырау ауданы, Үштөбе ауылынан барған тағы бір шаруа қожалығы «Алтын күбі» номинациясында жеңіске жетті.

– Біз 25 бие сауамыз, күн сайын шамамен 150 литр қымыз өндіреміз. Бүгін 600 литр қымыз алып келдім. Қала тұрғындары нағыз ауыл қымызының дәмін көрсін дедік, – дейді шаруа қожалығының иесі Серғазы Исабеков.

Фестиваль ұйымдастырушылары бұл шара ұлттық дәстүрлерді сақтау мен отандық брендтерді дамытуға бағытталғанын атап өтті. Сонымен қатар ұсынылған өнім көлемі бойынша рекордтық көрсеткішке қол жеткізілген.

Фото: Астана қаласы әкімдігінің баспасөз қызметі

Құралай ӘЛЖАППАР,

«QH»