Жеңіл атлетика жұлдыздары аллеясында – жаңа жұлдыз
Қарағандыда «Жеңіл атлетика жұлдыздары аллеясында» Париждегі Паралимпиада ойындарының жүлдегері Дастан Мұқашбековтың есімі жазылды. Параспортшы ядро лақтыру спорт түрінде қола медаль жеңіп алды.
Францияның астанасы Парижде өткен Паралимпиада ойындарында Қазақстанның атын асқақтатып, спорт әлемінде тағы бір тарихи жетістікке жеткен Дастан Мұқашбеков ядро лақтырудан қола медаль иегері атанды. 16 метр нәтижемен ол жаңа Азия рекордын орнатып, бұрынғы рекордын жаңартты. Бұл жеңіс – аталмыш спорт түрінен еліміз үшін тұңғыш жүлде. Дастанның ерлігі параспорт тарихына жарқын із қалдырып, оның табандылығы мен мықты рухын дәлелдеді.
– Алғысым шексіз! Мені құттықтап жатқандарына өте қуаныштымын. Жерлестер мені мақтан тұтады, енді міне менің жұлдызым осы «Даңқ алеясында» орнатылып жатыр. Егер мен Паралимпиадада алтын медаль алсам не болатынын елестете алмаймын. Бұл менің басты мақсатым, мен оған жету үшін бәрін жасаймын, – деді Дастан Мұқашбеков.
Еске салайық, өткен жылы Қ.Нұржанов атындағы Қарағанды жеңіл атлетика манежінде «Жұлдыздар аллеясы» ашылған-ды. Мұнда жеңіл атлетикадан Қазақстандағы жалғыз екі дүркін Олимпиада чемпионы Владимир Муравьев, Олимпиада ойындарының жүлдегері Дмитрий Карпов, сондай-ақ Азия ойындары мен Азия Чемпионаттарының жеңімпаздары Сергей Засимович пен Марина Аитова сияқты облыстың көрнекті спортшыларының жетістіктері мәңгіге белгіленген. Енді мұнда Дастан Мұқашбековтің де есімі бар.
Дастан Мұқашбековтің спортқа деген сүйіспеншілігі бала кезінен басталған. Әртүрлі спорт түрімен шұғылданып жүрген жас жігіт, 2016 жылы пара жеңіл атлетикаға ауысқаннан кейін өзінің нағыз күшін тапты. Ол осы уақытқа дейін әлем чемпионаттарының жүлдегері, Азия пара ойындарының жеңімпазы атанды. Ата-анасының айтуынша, Дастанның табысқа жетуінің басты себебі – оның ерік-жігері мен табандылығы. «Бұл үлкен еңбектің, табандылық пен мықты рухтың жемісі», – дейді олар.
Республика күні қарсаңында Қарағанды қаласының «Сарыжайлау» кинотеатрында Дастан Мұқашбековтің құрметіне арнайы шара ұйымдастырылды. Шараға жиналған өңірдің белсенді жастары спортшының жетістігін атап өтіп, оған ерекше қошемет көрсетті. Кездесу барысында Дастан жанкүйерлерімен сөйлесіп, олардың сұрақтарына жауап берді. Дастанның сөздері шараға жиналған жастарға үлкен рухани күш берді. Ол болашақтағы жоспарларын бөлісіп, спорттық мансабын жалғастыратынын жеткізді.
«Келесі Паралимпиада ойындары Лос-Анджелесте өтеді. Сол жарысқа да қатысуды жоспарлап отырмын. Одан кейінгі бәсеке Аустралияда болады. Денсаулық жарап жатса, соңына дейін күресе беремін», – деді ол.
Дастан Мұқашбековтің жетістігі – тек спорттық жеңіс қана емес, сонымен қатар жастарға үлгі боларлық рухани күштің көрінісі. Оның табандылығы мен ерік-жігері көптеген жастарға өмірлік мақсаттарын айқындауға көмектеседі. Спортшының болашақта Лос-Анджелестегі және Аустралиядағы Паралимпиада ойындарында да Қазақстанның көк байрағын тағы бір мәрте желбірететініне ел сенеді.
Қанағат ЖИЕНҚҰЛОВА,
«QH»