Қарағанды облысында виртуалды балабақша жұмыс істей бастайды
Қарағанды облысы елімізде бірінші болып «Sabidamu виртуалды балабақшасы» онлайн-платформасын іске қосады. Бұл ата-аналарға балаларын пайдалы іспен айналысуға ғана емес, сонымен қатар ерте дамуға көмектесетін сапалы әдістемелік материалдарға қол жеткізуге мүмкіндік береді.
Бұл туралы педагогтардың өңірлік тамыз кеңесінде хабарлады.
Балабақшаға бармайтын балалардың ата-аналарына көмектесу үшін жасына байланысты тәрбие жұмысына арналған бейне, аудио, ертегілер, тесттер, түрлі тапсырмалар мен материалдар бар веб-нұсқа мен мобильді қосымша әзірленуде.
– Бұл платформа балабақшаға бармайтын балаларға арналған. Жүйе балалардың белгілі бір жасына сәйкес әртүрлі контент әзірлейді. Балабақшаларда жинақталған тәжірибені онлайн форматқа аударамыз. Сондай-ақ, біз логопедтердің, психологтардың жұмысын автоматтандырғымыз келеді. Ата-аналар сұрақтар қоя алады, – деді SabiDamu платформасын әзірлеумен айналысатын «Өрлеу» компаниясының басшысы Фарида Ақшолакова.
Виртуалды балабақша келесі жылдың қаңтарынан бастап жұмыс істеуі керек.
Қарағанды облысында 2 жастан 6 жасқа дейінгі балаларды мектепке дейінгі біліммен қамту өсуде – өткен жылмен салыстырғанда ол 82,6-дан 84%-ға дейін өсті. Биыл 1107 орын ашылды. Өңірдің 404 мектепке дейінгі ұйымдарында 35 мыңнан астам бала дамуда.
– Мектепке дейінгі орындарды қамтамасыз ету көп жағдайда жеке инвестицияларды тарту есебінен шешіледі. Жаңа орындардың жалпы санының 72%-ы жеке ұйымдарда ашық, – деді Білім басқармасының басшысы Гүлбақыт Жүнісова. – Жаңа орындарға қажеттілікті қамтамасыз етуді шешу үшін үлгілік мемлекеттік балабақшалар салу талап етіледі. Әсіресе, 2 жастан 6 жасқа дейінгі балалар саны 8 мыңнан асатын Қарағандыда.
Қарағандыда алты жекеменшік балабақша, Қарағанды мен Приозерск қалаларында екі мемлекеттік балабақша салу жоспарлануда. Сондай-ақ, Гүлбақыт Жүнісова бұрынғы Теміртау Денсаулық сақтау басқармасының ғимаратында 200 орындық балабақша ашуға мүмкіндік бар екенін атап өтті. Қазір ғимаратты білім басқармасының балансына беру рәсімдері жүріп жатыр.
– Біз 2 жастан 6 жасқа дейінгі балаларды сапалы мектепке дейінгі біліммен қамтуды арттыру бойынша белсенді жұмыс істеуіміз керек. Бұл басты міндет. Біз жеке сектормен ынтымақтастықта, жеке балабақшалардың ашылуында үлкен әлеуеткөріп отырмыз, – деп атап өтті Қарағанды облысының әкімі Ермағанбет Бөлекпаев.