Қандай компаниялар «қара тізімге» енді?

Оқылды: 209

Қарағандылықтарды заңсыз салынып жатқан тұрғын үй кешендерінен пәтер сатып алуда сақ болуға шақырады. Облыс орталығында жаңа жеті ғимараттың жұмысы сот шешімімен тоқтатылды, тағы үшеуінің материалдары қаралуда. Олардың барлығы жоба сараптамасынсыз салынған. Қазір үлескерлердің ақшасын тарта алмайтын құрылыс салушылардың «қара тізімі» қалыптастырылуда.

Қарағанды облысының Мемлекеттік сәулет-құрылыс бақылау басқармасында қандай тұрғын үй кешендері заңсыз салынып жатқанын хабарлады.

Бұл тізімге келесі нысандар кірді:

«Хан» ТК (Мұқанов көшесі, 19/2 уч.), құрылыс салушы – «Satti Lux Stroy» ЖШС;

«Манхэттен» ТК (Тәттімбет көшесі, 10Б з/у), құрылыс салушы – «КапиталСтрой-XXI» ЖШС;

«Al-Farabi» ТК (Мұқанов көшесі, 55/2), құрылыс салушы – «Turan Invest Development» ЖШС;

«Томирис» ТК (067-есептік орам, 502-құрылыс), құрылыс салушы – «Тұрғын үй қоры» ЖШС;

«Баспана-3» ТК (Мұқанов көшесі, 43/4), құрылыс салушы – «СМК Group» ЖШС;

«Central Park» ТК (Мұқанов көшесі, 9/3-құрылыс), құрылыс салушы – «СМК Group» ЖШС;

«Нұра» ТК (Мұқанов көшесі, 51/4 учаскесі), құрылыс салушы – «Satti Lux Stroy» ЖШС;

КТҮ (Ержанов көшесі, 63/2), құрылыс салушы – «Revival alliance» ЖШС;

КТҮ (Рысқұлов көшесі, 5/3), құрылыс салушы – С.А.Есенбаев;

ТК (Университет көшесі, 28/19), құрылыс салушы – «Sadu group» ЖШС.

– Жалпы, біз салынып жатқан 60-қа жуық тұрғын үй нысанын бақылауда ұстап отырмыз. Мониторинг барысында хабарлау тәртібі бұзылған он тұрғын үй кешені анықталды. Заң бойынша, әрбір құрылыс салушы бізге құрылыстың басталғаны туралы хабарлауы керек. Бұл онлайн, электронды үкіметтің веб-порталы арқылы жүзеге асырылады, – деп түсіндірді ГАСК басқармасының басшысы Сержан Аймақов. – Бар мәселе, негізінен, сараптама қорытындысының болмауында. Яғни олар авторлық және техникалық қадағалаусыз құрылыс жүргізуде. Үлескерлер үшін қауіп-қатер туындайды. Бірақ мораторийге байланысты біз шағын кәсіпкерлік субъектілеріне тексеру жүргізе алмаймыз.

Ол заңсыз салынған жаңа ғимараттар арасында тоғыз қабатты тұрғын үй кешендері бар екенін атап өтті. Болашақта олар қабылдау актілерін ала алмайды. Сонымен қатар үйлерді бұзу туралы сот ісін бастауға болады.

Құрылыс салушылар ҚР ӘҚБтК-нің 314, 316, 321 және 463-баптары бойынша әкімшілік жауапкершілікке тартылды.

– Бұдан басқа, заңда ӘҚБтК-нің 320-бабы бойынша үлескерлерді заңсыз тартқаны үшін жауапкершілік көзделген. Әлеуметтік желілердегі жарнама жөнінде материалдарды сотқа беру үшін құқықбұзушыларды анықтаймыз. Мәселен, 2022 жылы «OPTIMAL BUILD COMPANY» ЖШС «Третий оптимальный» ТК (Мамыраев ш/а, 6/3-құрылыс) бойынша, «ProfInvest» ЖШС «Zaman 2» ТК (Бөкетов к-сі, 60а) бойынша әкімшілік жауапкершілікке тартылды. Бүгінгі таңда «Манхэттен» ТК бойынша «КапиталСтрой-XXI» ЖШС (Тәттімбет көшесі, 10Б з/у), «Аспан» ТК бойынша «SAPA CITY» ЖШС (Карбышев көшесі, 5/3) хаттамалар жасалды. Бұл жұмысты жалғастырамыз, – деді Сержан Аймақов.

Құрылысшылардың «қара тізіміне» енген әрбір компания жарияланатын болады.

Өз тілшімізден