Жерлестеріміз үздік косплей шеберлері қатарынан көрінді!
Астанада өткен Орталық Азиядағы ең ірі гик-фестиваль аясында ұйымдастырылған халықаралық косплей байқауы өз деңгейінде жоғары деңгейде өтті. Байқауда Теміртаудан шыққан Анастасия Герасимова «Жас падаван» номинациясында жеңіске жетіп, 500 мың теңге жеңіп алды. Ал Қарағанды қаласының талантты косплейшісі Владислава (VladizArt) 3-орынды жеңіп алып, 1 миллион теңге сыйақыға ие болды.
Бұл шараға комикс, видеоойын және аниме жанкүйерлерінен құралған 75 мыңнан астам адам жиналды. Косплей – жай ғана костюм кию емес, бұл – шынайы өнер: киім тігу, гримдеу, сахналық қойылымдар мен керек-жарақтарды жасау. Қатысушылар өз кейіпкерлерінің мінезі мен бейнесін дәл көрсетуге барын салды.
Теміртаулық Анастасия Герасимова байқауға алғаш рет қатысып, атақты ойын кейіпкерінің образын сомдады. Анастасия өз әсерімен бөлісіп:
«Былтыр фестивальге тек қыдырып барған едім, танымал қатысушылардан қолтаңба жинап, косплейшілерге сырттай қызыға қарадым. Сол кезде-ақ өзім де қатысқым келді. Үйге келген соң анама «Мама, осыны жасап көрейік» дедім. Ол таңғалып: «Біз ондайды жасай алмаймыз, сен бізге тым көп сенім артып отырсың» деді», – дейді жас шебер.
Анастасия таңдап алған кейіпкер – атышулы ойыннан алынған зұлымның образы. Түрі жағынан ұқсас болғанымен, мінезін жеткізу оңай болмаған. Дегенмен, актерлік шеберлігі бұл қиындықты еңсеруге көмектесті.
«Қазылар алқасының бірі менің түрім кейіпкеріме қатты ұқсайтынын айтты. Осы ұқсастықтың арқасында мен қосымша балл алдым. Дегенмен, кейіпкерім өте қатігез, сондықтан мінезіміз екі бөлек. Бұл – «Resident Evil Village» ойынындағы басты жауыз», – деп атап өтті Анастасия.
Қарағандыдан қатысқан Владислава да жоғары деңгейдегі өнерін көрсетті. Ол бала кезінен армандаған кейіпкері – Астридтің рөлін сахналап, байқауда 3-орынды жеңіп алды. Оның костюмі ғана емес, сахналық қойылымы да ерекше көзге түсті. Финалдық сәтте айдаһардың жарқ етіп пайда болуы көрермендерді тәнті етті.
Қазіргі таңда гик-мәдениет тек хобби емес, шығармашылық пен табыс көзіне айналған ерекше құбылысқа айналды. Осындай фестивальдер жастарға өздерін танытып, өнерін паш етуге тамаша мүмкіндік беруде.