Жер астындағы сыр

Қарағанды университетінің археологтары Нұра ауданынан ерекше балалар қорымын тапты. Бұл жаңалық археология саласында үлкен сенсация тудырды. Археологтар әлі күнге дейін белгісіз болып келген қабірді зерттеп, 9-12 жас шамасындағы баланың сүйегін тапты. Бұл бала кім болған? Экспедиция қалай өтті және жер асты қандай тарихи жәдігерлерге байыды? Толығырақ сюжеттен таныса аласыздар.

Нұра ауданының кең даласында Ізенді-6 қорымын зерттеу кезінде археологтар күтпеген жерден ерекше қабірге жолықты. Жер астынан табылған арнайы шұңқырдан 9-12 жас аралығындағы баланың сүйегі анықталды. Қасына сол дәуірге тән тұрмыстық заттар мен әшекейлер ілінген. Бұл жәдігерлер шамамен сегіз ғасыр бойы топырақ астында сақталған.

– Топырақты алу барысында бұзылмаған адам қаңқасы жатқан топырақ камерасы анықталды. Оның жанынан садақ жебесінің ұшы, киім қалдықтары, асықтар мен сұрақ белгісіне ұқсайтын сырға табылды. Мұндай сырғалар қыпшақ халқы арасында кең таралған және өзіндік мәдени белгі ретінде қарастырылады, – дейді Қарағанды университеті жанындағы Сарыарқа археология институтының директоры Алексей Кукушкин.

Антропологтардың қорытындысы бойынша, баланың өмірінде қолы сынған. Қабір XII-XIII ғасырларға тән. Табылған заттар – ортағасырлық кезеңнің шынайы тарихи куәлігі. Қазба жұмыстары Мәдениет басқармасының қолдауымен жүргізілді. Археологтар болашақта бұл өңірде тағы да құнды жәдігерлер табылуы мүмкін деп сенеді.

Құралай КӨБЕНОВА,

«QH»