«Жастар – болашақтың кепілі»: Қарағандыда есірткіге қарсы форум өтті
Қарағандының Орталық саябағында «Salauatty ómir saltyn tańda!» атты жастар форумы өтті. Ашық аспан астында өткен ауқымды шараның басты мақсаты – есірткіге тәуелділікке қарсы жастардың иммунитетін қалыптастыру, салауатты өмір салтын насихаттау болды.
Форум аясында спорттық көрсетілімдер, кинологтар шоуы, еріктілердің акциялары, ақпараттық-түсіндіру жұмыстары ұйымдастырылды. Шараның соңында дискотека және жүлделер ұтысы өткізіліп, қатысушыларға көтеріңкі көңіл-күй сыйлады.
Жиын барысында мамандар, еріктілер мен құқық қорғау органдарының өкілдері есірткінің таралу жолдары, оның салдары және қазіргі қоғамдағы өзектілігі төңірегінде пікір алмасты.
Қарағанды облыстық полиция департаменті бастығының бірінші орынбасары Әбіл Әбілдин форумда сөйлеген сөзінде жастар арасындағы есірткімен байланысты құқықбұзушылықтардың жиілеп кеткенін айтты.
«Мақсат – жастарға есірткінің зияны, оның қауіпі мен салдары туралы тереңірек түсіндіру. Есірткі тек адам денсаулығын ғана емес, бүкіл болашағын құрдымға жібереді. Қазіргі таңда бұл мәселе тек тұтынушымен шектелмейді, сонымен қатар есірткі тасымалдаушылар – «закладчиктер» арқылы да ушығып отыр. Әсіресе интернет кеңістігі мен түрлі мессенджердің қолжетімділігі жастар арасында бұл проблеманың кеңінен таралуына жол ашады. Көп жағдайда жасөспірімдер жеңіл жолмен ақша табу үшін қылмыстық әрекетке тартылады. Сондықтан мұндай түсіндіру шараларының негізгі міндеті – жастарды дер кезінде сақтандыру, санасын сергек ұстау және дұрыс таңдау жасауға бағыттау», – деді ол.
Форумға қатысқан танымал спортшылар, соның ішінде Олимпиада чемпионы, облыстық спорт басқармасының басшысы Серік Сәпиев те жастарға салауатты өмір салтын ұстанудың маңызын жеткізді.
«Есірткіге қарсы қозғалысты дұрыс әрі қажет бастама деп есептеймін. Себебі бүгінде жастардың бір бөлігі оны тарату ісімен айналысып жүр. Біз мұндай шараларды ұйымдастыру арқылы осының алдын алуға тырысамыз. Менің ойымша, зиянды әдеттерден арылудың ең тиімді жолы – спорт. Егер адам спортты шын жақсы көріп, тұрақты түрде айналысса, ол өмірдің мәнін басқа қырынан таниды. Тіпті ондай адамда зиянды әрекетке бармақ түгілі, оны ойлауға да уақыты болмайды», – деді ол.
Форумға еріктілер де белсене қатысты. Олар түрлі ақпараттық материалдар таратып, көшелердегі есірткі жарнамасын жою жұмыстарымен айналысып жүргенін айтты.
«Біз есірткіге қарсы шараларға қолдау білдіреміз. Антинаркотикалық бағыттағы кез келген бастамаға атсалысып, полиция департаментімен бірлесе жұмыс істейміз. Арнайы буклеттер таратып, көшедегі есірткі жарнамаларын, түрлі граффитимен бояп, алдын алу шараларын ұйымдастыруға көмектесеміз. Өз басым есірткіге түбегейлі қарсымын. Мұндай зиянды заттарға ақша жұмсағанша, сол қаржыны пайдалы дүниеге арнаған әлдеқайда жақсы», – дейді ерікті Рината Хасанова.
Сондай-ақ қоғам белсенділері мен жастар ұйымдарының өкілдері атсалысып жүргендері үшін Алғысхаттармен марапатталды.
«Студенттер үйінде талай кездесу өткіздік. Жастармен тығыз жұмыс істеп, нақты іспен айналысу – мен үшін басты міндет», – дейді қоғам белсендісі Нартай Рымқанов.
Ресми деректерге сүйенсек, еліміздегі нашақорлардың 90 пайызы – 30 жасқа толмағандар. Бұл – дабыл қағарлық көрсеткіш. Мамандардың айтуынша, салауатты өмір салты мен ақпараттық шаралар – жастарды бұл індеттен қорғаудың тиімді жолы.
Қарағандыда өткен форум – сол күрестің бір көрінісі. Ал қоғам болып күреспесек, болашақ ұрпақтың тағдырына балта шабуымыз мүмкін.
Құралай КӨБЕНОВА,
«QH»