Жасанды интеллект саласындағы үздік
Бейжіңде өткен жасанды интеллектке арналған халықаралық олимпиадада қазақстандық оқушы алғаш рет жеңіс тұғырынан көрінді. 60-қа жуық елден келген 300-ден астам қатысушының арасынан Сұлтанби Исатай топ жарып, алтын медаль иеленді. Бұл – ел үшін үлкен жетістік.
Жасанды интеллект бойынша халықаралық олимпиада – білім мен шеберлікті сынайтын ең беделді жарыстардың бірі. Мұнда тек теория емес, заманауи технологияларды тәжірибеде қолдана білу басты шарт. Сұлтанби Исатай – Қарағанды Назарбаев Зияткерлік мектебінің оқушысы. Оған дайындық үшін бірнеше ай бойы күн сайын уақытын, күш-жігерін сарп етуге тура келген.
– Жалпы олимпиада өте қиын болды деп ойлаймын. Себебі бұл халықаралық деңгейдегі жарыс, әр ел тек мықтыларын ғана жібереді. Әр тапсырманы мұқият қарап, қайта-қайта ойлануға тура келді. Бұның бәрі елдегі мықты дайындығымның арқасы деп есептеймін, – деді IOAI – 2025 халықаралық олимпиадасының жеңімпазы Сұлтанби Исатай.
Халықаралық олимпиадаға еліміздің әр өңіріндегі жас ғалымдар арасында онлайн іріктеу турлары өткен. Жерлесіміз сол іріктеуде оза шауып, әлемдік додаға қатысатын ұлттық құрама сапына енген. Сұлтанбидің айтуынша, мұндай жарыстарда психологиялық дайындық та аса маңызды. Ол үшін кез келген қиындыққа қарсы тұрып, соңына дейін күресу қажет.
– Менің ойымша, ең маңызды қасиет – ешқашан берілмеу. Өзіңнен ештеңе шықпай жатқандай көрінсе де, бастаған ісіңді соңына дейін аяқтау керек. Екінші тур кезінде алғашқы төрт сағат бойы бірде-бір тапсырманың шешімін таба алмай, көңіл-күйім түсіп кетті. Бірақ берілмей, соңғы бір сағатта барлығын оңай орындап шықтым, – деді жеңімпаз.
Додаға қатысқан ұлттық құрама сапында тағы бір қарағандылық оқушы Батыр Ерденов бар. Ол да олимпиададан құрмет грамотасымен марапатталды. Бұл – аймақ жастары үшін қуанышты жағдай.
– Шаршамай, талмай еңбек етіп жатқан ұстаздарымыз бен жүйелі жұмыстың арқасы деп ойлаймын. Өйткені ата-аналар да балаларының оқуына жағдай жасап, уақыт бөлсе, балалар міндетті түрде нәтиже көрсетеді, – деді Назарбаев Зияткерлік мектебі директорының орынбасары Әлібек Әсетов.
Бейжіңдегі бұл жеңіс қарағандылық оқушылар үшін тек бастама ғана. Олар болашақта жасанды интеллект саласын терең меңгеріп, еліміздің технологиялық дамуына үлес қосуды көздейді.
Ералы ҒАНИ,
«QH»