Жас сарбаздар әскери ант қабылдады
Қарағандыдағы ҚР Ұлттық ұланының «Орталық» өңірлік қолбасшылығына қарасты 5451 әскери бөлімінде жас сарбаздардың салтанатты түрде әскери ант қабылдау рәсімі өтті. Сап түзеген болашақ жауынгерлер еліміздің түрлі өңірінен келіп, Отан алдындағы борышын өтеуге кірісті.
Қызмет жолындағы алғашқы маңызды қадам. Салтанатты рәсімге 350-ге жуық адам жиналды. Олардың қатарында жас сарбаздар, олардың ата-аналары мен ресми қонақтар болды. Бір айлық бастапқы әскери дайындық курсынан өткен 250-ге жуық жас жауынгер салтанатты түрде Ұлттық ұлан сапына қосылды. Олар осы уақыт ішінде әскери тәртіп пен қызметтің негізгі талаптарымен танысып, алғашқы әскери машықтарын меңгерді.
– Мен үшін бұл – әрбір ер азаматтың, ұлдың және болашақ әкенің міндеті деп есептеймін. Әрбір азамат өз Отанын қорғап, кейінгі ұрпаққа үлгі болуы керек. Бүгінгі күн – менің ер-азамат ретінде қалыптасуыма маңызды әрі мәнді қадам. Ант қабылдау рәсімі арқылы мен елімнің адал қорғаушысы болуға ниеттенемін, – деді 5451 әскери бөлімінің сарбазы Тәмірлан Әбеуов.
Жас ұрпақ ел тыныштығы мен қауіпсіздігін қорғауға кірісті. Жуырда жас сарбаздар Отан алдындағы қасиетті борышын өтеуге ресми түрде аттанып, әскери қызмет жолын бастады. Осыған орай «Орталық» өңірлік қолбасшылығының қолбасшысы оларды ел қорғаушылар сапына қосылуымен құттықтап, бұл қадамның жас буын мен бүкіл қоғам үшін ерекше маңызға ие екенін атап өтті.
– Қазақтың даңқты батыры Бауыржан Момышұлының отаншылдық туралы айтқан ұлағатты сөздері – біз үшін баға жетпес рухани мұра. Ол кісі: «Отанға деген сүйіспеншілік – ең алдымен ата-анаңа, бауырларыңа, туған ауылыңа, қалаңа және ұлтыңа деген махаббаттан басталады» деген. Бұл – жай ғана сөз емес, жүректен шыққан, терең түйсікпен келген сенімді көзқарас деп ойлаймын. Осындай құндылықтарды біздің көпұлтты жас ұрпақ үнемі жадында ұстап, санасына сіңіріп өссе екен деймін, – деп атап өтті «Орталық» өңірлік қолбасшылығының қолбасшысы Сәкентай Шекарбеков.
Жас сарбаздар ел қорғаны болуға бір қадам жақындады. Салтанатты рәсімде олар Отан алдында адал қызмет етуге ант беріп, әскери өмірге алғашқы қадам жасады. Бұл сәтке толқыған көңілмен әрі мақтанышпен куә болған ата-аналар балаларының ел қорғаушылар сапына қосылғанын зор мәртебе деп бағалады.
– Бауырымның ант қабылдау сәтіне арнайы қолдау көрсетуге келдік. Бұл – біздің отбасымыз үшін үлкен әрі толқытатын сәт. Барлығымыз бірге келіп, сарбаздарға рухани демеу болуға тырыстық. Осындай маңызды күнде жас сарбаздарға сәтті, тыныш қызмет тілеймін. Ең бастысы – амандық, елге есен оралып, ата-ананың қуанышына бөленсін деймін, – дейді сарбаздың әпкесі Тоқмейіл Әбеуова.
Салтанатты рәсім Мемлекеттік әнұран мен әскери марштардың үнімен түйінделді. Бұл күн – жас сарбаздар үшін жаңа, жауапты кезеңнің бастауы. Енді олар елдің тыныштығы мен тұрақтылығын қорғау жолында абыройлы қызметке кіріседі.
Жұпар АМАНБАЙҚЫЗЫ,
«QH»