Жаңа оқу жылына дайындық қалай?
Жаңа оқу жылының басталуына санаулы апта қалды. Қарағанды облысында биылғы 2025-2026 оқу жылында 175 мыңға жуық оқушы мектеп табалдырығын аттамақ. Оның ішінде бірінші сыныпқа қазірдің өзінде 15 616 өтініш қабылданған. Бұл білім жолына алғаш қадам басқалы отырған мыңдаған баланың үлкен өмірге жасаған алғашқы қадамы. Ал олардың осы жолға сенімді және тепе-тең бастауына жағдай жасау ата-аналар мен мемлекет тарапынан маңызды міндет.
Дәстүрлі түрде жыл сайын өткізілетін «Мектепке жол» республикалық акциясы 1 тамызда басталып 30 қыркүйекке дейін жалғасады. Оның басты мақсаты – көпбалалы, әлеуметтік осал және қиын өмірлік жағдайға тап болған отбасылардан шыққан балаларды жаңа оқу жылына дайындықпен қамтамасыз ету. Акция аясында «Балаларға жақсылық жаса!», «Ауыл балаларына – мектепке сыйлықтар», «Отбасы отбасына көмектеседі: баланы мектепке жинаймыз!» секілді қайырымдылық шаралары ұйымдастырылуда.
– Жыл сайын ұйымдастырылатын «Мектепке жол» акциясының негізгі мәні – ешбір бала жаңа оқу жылын қиындықпен бастамауы керек деген ұстаным. Біз атаулы әлеуметтік көмек алатын және күнкөріс деңгейінен төмен отбасылардан шыққан, сондай-ақ жетім немесе ата-анасының қамқорлығынсыз қалған балаларды ерекше назарда ұстаймыз. Биыл да бұл жұмыс жалғасын тауып, ата-аналарға 46 228 теңге көлемінде ақшалай көмек көрсетіледі. Бұл қаражат мектеп формасын, аяқ киім және кеңсе тауарларын сатып алуға жұмсалады, ата-аналардың карточкалық шотына аударылады. Сонымен қатар, көмекті алғандар он күн ішінде оқу құралдарын сатып алғаны туралы есеп беруге тиіс. Біз қаражаттың ашық әрі мақсатты жұмсалуын қамтамасыз етуді басты назарда ұстап отырмыз, – деді Қарағанды облыстық білім басқармасының мектепке дейінгі тәрбие, жалпы орта және арнайы білім беру бөлімінің басшысы Гүлдана Нұрсұлтан.
Жәрдем алу тәртібі де айқын: ата-аналар мектеп кеңсесіне барып өтініш беруі немесе электронды үкімет порталы арқылы тіркелуі қажет. Сонымен қатар, тиісті әлеуметтік санатты растайтын құжаттар тізбесі талап етіледі. Әлеуметтік көмек көрсетілмейтін, бірақ өмірлік қиын жағдайға тап болған отбасылар үшін де арнайы өтініш қабылданып, шешімді қамқоршылық кеңесі қабылдайды.
Жаңа оқу жылы қарсаңында мектеп формасына қатысты талаптар да айқындалды. Биыл облыстың барлық мектебінде ата-аналар жиналысы мен қамқоршылық кеңестерінің отырыстары өтіп, мектеп формасының стандарттары бекітілді. Ұлдарға арналған формада шалбар, көйлек, блейзер, ал қыздарға юбка, блузка, сарафан және т.б. қарастырылған. Спорттық киімдер де жаңартылған тізімге сай болуы тиіс.
Отандық тауар өндірушілердің қатысуымен мектепке қажетті киімдер мен кеңсе тауарларының көрме-жәрмеңкелері ұйымдастырылуда. Бұл ата-аналар үшін сапалы әрі қолжетімді тауарларды төмен бағамен сатып алу мүмкіндігін береді.
– Біздің мақсат – әлеуметтік жағдайына, тұрмыстық деңгейіне қарамастан әрбір баланың толыққанды білім алуына мүмкіндік жасау. Бұл мемлекеттің де, қоғамның да ортақ жауапкершілігі. Осы орайда барша кәсіпкерді, үкіметтік емес ұйымдар мен жай ғана бей-жай қарамайтын азаматтарды акцияға белсенді қатысуға шақырамыз. Бір баланың мектепке баруына көмектесу болашаққа жасалған ең ізгі инвестиция, – деп атап өтті Гүлдана Нұрсұлтан.
Жаңа оқу жылына дайындық тек әлеуметтік қолдаумен шектелмейді. Облыста ауқымды жөндеу және инфрақұрылымды жаңарту жұмыстары да қатар жүргізілуде. Ағымдағы жылы 239 білім беру нысаны жөндеуден өтуде. Оның ішінде – 166 мектеп, 54 балабақша, 12 қосымша білім беру орталығы, 6 колледж және ерекше білім беру қажеттілігі бар балаларға арналған 1 қолдау орталығы. Бұл мақсатқа 15,7 млрд теңге бөлінді. Оның ішінде күрделі жөндеуге – 8,2 млрд теңге, ал ағымдағы жөндеуге – 7,5 млрд теңге қарастырылған.
Мемлекет басшысының тапсырмасына сәйкес 2025 жылы Қарағанды облысында 29 мектеп жаңғыртылмақ. Сонымен қатар, Қарқаралы ауданының Талды ауылында 200 орындық жаңа мектеп пайдалануға беріледі. «Келешек мектебі» жобасы аясында тағы алты жаңа мектептің құрылысы аяқталады деп күтілуде.
Білім сапасын арттыру мақсатында 2025 жылы облыс мектептеріне 77 заманауи пәндік кабинет сатып алынбақ. Олардың ішінде – физика, химия, биология, STEM және робототехника кабинеттері бар. Осылайша, қазіргі заманғы оқу кабинеттерімен қамтамасыз етілу көрсеткіші 85%-ға дейін жетеді.
Жаңа оқу жылының басталуы тек күнтізбелік оқиға емес, болашаққа бет алған ұрпақтың жаңа белесі. Осы жолда мемлекет те, қоғам да, ата-ана да баланың білім алуға толықтай дайын болуы үшін жұмыла жұмыс істеуде. Жүргізіліп жатқан шаралар тек материалдық көмекпен шектелмей, балаларға деген шынайы қамқорлықты, мейірімділікті көрсетеді.
Ералы ҒАНИ,
«QH»