Туристік аймақтардың жағдайы – билік бақылауында
Демалыс орындарына демалуға келген туристердің қолайсыз жағдайға тап болуы еліміздегі кейбір туристік аймақтарда жиі қайталанатын мәселе. Инфрақұрылымның төмендігі, сапасыз сервис пен қауіпсіздіктің назардан тыс қалуы – туризм саласының басты проблемалары. Президент Қасым-Жомарт Тоқаев бұл мәселелерді шешуді Үкіметке нақты тапсырған болатын.
«Елдегі демалыс орындарының дайындығы тым төмен», – деген сыннан кейін мемлекет басшысы жауапты лауазымды тұлғаларды анықтап, оларды жауапқа тартуды міндеттеді.
«Балқаш өңірінде бірқатар өзекті мәселелер бар, және бұл мемлекеттік органдар тарапынан қатаң бақылауды талап етеді» – деп атап өтті аймақ басшысы.
Облыс әкімі туризм саласындағы кейбір кемшіліктерге тоқталып, жергілікті атқарушы органдарға нақты тапсырмалар берді. Демалушылар саны жыл сайын өсіп келеді, алайда инфрақұрылым, қызмет көрсету сапасы мен қауіпсіздік мәселелері әлі күнге шешімін таппай отыр.
– Біз жағажайларға еркін кіруді қамтамасыз еттік. Бірақ кәсіпкерлердің әрекеті алаңдатады – көпшілігі аумақтың жай-күйін бақылауды доғарды. Барлық жауапкершілікті әкімдікке артып қойған. Бұл – дұрыс емес. Мұндай жағдай тек Балқашта ғана емес, өзге өңірлерде де бар. Егер жалға алушылар өз аймағын лайықты жағдайда ұстай алмаса, онда мұндай жағажайлар коммуналдық меншікке қайтарылатын болады, – деді өңір басшысы Ермағанбет Бөлекпаев.
Баға саясаты мәселесі де бақылауға алынады. Демалыс маусымында кей кәсіпкерлердің бағаны өз бетімен көтеріп жіберуі жиі кездеседі, бұл салық органдарының назарына алынатын мәселе.
«Туристер легі артқан кезде кей кәсіпкерлер бағаларды ойдан шығарып, өздігінен қымбаттатып жібереді. Бұл – салық департаменті үшін ескеретін жайт. Сіздерді де арнайы шақырдық. Барлық кәсіпкерлер, әсіресе көпшілік демалатын аймақтарда, салық жүйесінде жұмыс істеуі тиіс» – деді әкім.
Санитарлық жағдай да назардан тыс қалмай отыр. Трассалар бойындағы санитарлық тораптардың көпшілігі жұмыс істемей тұр. Бұл мәселені шешу үшін «ҚазАвтоЖол» мекемесіне тапсырма берілді.
«Балқаш әкімдігіне және туризм басқармасына кәсіпкерлермен бірлесіп, қоғамдық әжетханалар мен тамақтану орындарының санын көбейтуді тапсырамын. Ең бастысы – санитарлық талаптар сақталуы қажет. «ҚазАвтоЖол» мекемесіне трасса бойына қосымша әжетханалар орнатып, жол инфрақұрылымындағы кемшіліктерді жедел түрде жою тапсырылды» – деді Ермағанбет Бөлекпаев.
Сонымен қатар, демалыс аймақтарына апаратын жолдардағы апаттылықты азайту мақсатында ескерту белгілерін алдын ала орнату және патрульдік бақылауды күшейту жұмыстары жүргізілуде.
Қарағанды облысында Қарқаралы, Теміртау, Абай және Ақтоғай аудандары ерекше бақылауда. Мұнда санитария, тұрмыстық қалдықтарды уақытылы шығару, медицина және полиция қызметтерінің тәулік бойы жұмыс істеуі маңызды.
Баға ашықтығын сақтау және кәсіпкерлерге қызмет сапасын арттыруда қолдау көрсету де басты басымдыққа айналды.
Құралай ЖҰМАҒАЛИҚЫЗЫ,
«QH»