Теміржол тынысын бақылайтын мамандар
Пойыздардың дәл уақытында, қауіпсіз жүруі – жол диспетчерлерінің тынымсыз еңбегінің нәтижесі. Теміржол қозғалысын үйлестіретін бұл мамандар кестені бақылап, станциялар арасындағы байланыс пен белгі беру жүйесін реттейді. Олардың кәсіби біліктілігі мен жедел шешім қабылдау қабілеті – бүкіл теміржол жүйесінің үздіксіз жұмыс істеуінің кепілі.
Диспетчерлік байланысқа келіп түскен әрбір хабар назардан тыс қалмайды. Ботагөз Маселова ақпаратты мұқият саралап, тиісті учаскелерге жедел түрде бағыттап отырады. Жұмыстағы жауапкершілік, шапшаңдық пен ұқыптылық – оның басты ұстанымдары.
– Жұмысымыз оңай емес, өте қарқынды әрі жауапкершілікке толы. Уақыт жетіспейтін сәттер көп, бірақ соған қарамастан, бұл жұмыс өзіне баурап алады, қызықты. Диспетчерлер әрдайым екі жақтың – басшылық пен учаске мастерлерінің арасында байланыстырушы буын іспеттіміз. Біз мастерлердің атқарып жатқан жұмыстарын қадағалап, жаңа тапсырмаларды беріп отырамыз. Кейде өздері де біз арқылы ақпарат жолдайды. Яғни, біз тек бақылаушы ғана емес, өндірістік процестің белсенді үйлестірушісіміз, – деді 24-ші Қарағанды жол дистанциясының жол диспетчері Ботагөз Маселова.
Теміржол саласы Ботагөз Маселова үшін жай ғана мамандық емес – бала күнінен таныс, жүрегіне жақын орта. Ата-анасының жолын қуып, бүгінде ол осы саладағы отбасылық дәстүрді лайықты жалғастырып келеді. Жауапты қызметтің жүгін абыроймен арқалаған маман әр пойыздың уақытылы және қауіпсіз жетуіне мұқият бақылау жасайды.
– Теміржол саласында еңбек етіп келе жатқаныма 20 жыл болды. Соңғы жылдары жол диспетчері ретінде Сортировкада жұмыс істеп жүрмін. Бұл сала мен үшін жат емес – отбасымыз түгелдей дерлік теміржолшылар. Әкем мен анам да осы салада ұзақ жыл еңбек етіп, бүгінде зейнетте. Жұмыс өзіме ұнайды, әр күні жаңа жағдай, түрлі мәселемен бетпе-бет келеміз. Көп жағдайда адамдардың проблемасын шешуге атсалысамыз – біреуге жол көрсету, біреуге кеңес беру, бір сөзбен айтқанда, өз жұмысымыз арқылы өзгелерге көмектесеміз. Путеецтерге де, бастықтарға да қолдау білдіріп, байланыс орнатып отырамыз, – дейді Ботагөз Маселова.
Теміржол саласында 19 жылдық тәжірибесі бар Гүлбақыт Байғазина – өз ісінің нағыз шебері. Ол келіп түскен материалдардың сапасын мұқият тексеріп, барлық құжаттың ретпен жүргізілуін қамтамасыз етеді. Мамандығы мұқияттылықты, жауапкершілікті және жедел шешім қабылдауды талап етеді. Гүлбақыт осы талаптардың үдесінен шығып келеді.
– Жұмысым маған ұнайды, себебі ол әрқашан қызықты әрі жан-жақты. Қазір жазғы уақытта көптеген жұмыс белсенді түрде жүргізілуде және біз солардың барлығын мұқият бақылауда ұстаймыз. Келген материалдарды толықтай қабылдап, оларға қатысты барлық құжатты ретімен жүргізу біздің басты міндетіміз, – деп қосты 24-ші Қарағанды жол дистанциясының жол инженері Гүлбақыт Байғазина.
Қазіргі уақытта жол дистанциясында 651 қызметкер еңбек етуде. Олардың кәсіби шеберлігі – жұмысшы мамандықтар жылында ерекше бағаланатын және ұжымның негізгі жетістігін қамтамасыз ететін басты факторлардың бірі.
Қанағат ЖИЕНҚҰЛОВА,
«QH»