Тамыздағы қос мереке

Қарағанды облысы биылғы тамызды ерекше мерекелік көңіл күйде қарсы алмақ. Өңірде Қазақстан Республикасы Конституциясының 30 жылдығы және дәстүрлі Кеншілер күніне орай 600-ден астам іс-шара ұйымдастырылады.

Басты оқиға – «Негізгі заңға 30 жыл: тәуелсіз мемлекеттің жоғары мәртебесі» атты облыстық форум. Ол 30 тамыз күні өтеді. Жиында құқық қорғау органдарының қызметкерлері ведомстволық наградалармен марапатталып, дарынды мектеп түлектеріне облыс әкімінің гранттары табысталады.

Әлеуметтік нысандар мен игі істер легі

Мереке қарсаңында өңірде бірқатар маңызды жобалар жүзеге асады. 27 тамызда Абай және Бұқар жырау аудандарында бес фельдшерлік-акушерлік пункт ашылады. 28 тамызда Абай ауданында әлеуметтік осал топтағы азаматтар мен көпбалалы отбасыларға 30 пәтер мен 20 үй кілті тапсырылады. 29 тамызда Үштөбе ауылында 200 орындық Мәдениет үйі, ал Шахтинск қаласында автокартодром есігін айқара ашады.

Сонымен қатар, облыста «Конституцияға 30 жыл – 30 ізгі іс» акциясы жалғасуда. Жоба аясында көпбалалы отбасыларға, аз қамтылған азаматтарға және жалғызбасты зейнеткерлерге көмек көрсетілуде.

Кеншілер күніне арналған салтанатты шаралар

Өңірдің басты кәсіби мерекелерінің бірі – Кеншілер күніне орай 40-қа жуық шара өтеді. 29 тамызда Кеншілер мәдениет сарайында 40-тан астам еңбек озаты мемлекеттік және ведомстволық наградаларға ие болады. Кеш қонақтары – опера әншісі Дамир Садуақасов пен эстрада жұлдызы Владимир Кузьмин.

30 тамыз күні сағат 18:00-де Қарағандының Тәуелсіздік алаңында қазақстандық және шетелдік әртістер – AYAU, Sadraddin, «Ирина Кайратовна» тобы және Zivert қатысатын үлкен концерт өтеді. Мереке күні Бұқар жырау даңғылы мен Әлиханов көшесінің бір бөлігі уақытша жабылады, ал тұрғындар мен қонақтарды қоғамдық көлік тегін тасымалдамақ.

Мерекелік бағдарлама 31 тамызда жалғасады.

Қарағандының Орталық саябағында дәстүрлі «Ән айтамын, Қарағанды!» вокалдық байқауы, «Ерекше екі жұлдыз» инклюзивті фестивалі және «Қарағандылық вернисаж» арт-жобасы өтеді. Облыстың өзге қалаларында да мерекелік концерттер ұйымдастырылады:

Шахтинск – сағат 15:00, әкімдік алдындағы алаңда;

Саран – сағат 18:00, «Сұңқар» стадионында;

Абай – сағат 18:00, қалалық саябақта.

Көрермендер Айқын Төлепберген, ALEM және Мақпал Исабекованың өнерін тамашалайды. Мерекелік кеш отшашумен қорытындыланады.

Қауіпсіздік қатаң бақылауда

Облыс әкімі Ермағанбет Бөлекпаев барлық шараның сапалы және уақытылы өтуін жеке бақылауына алды.

– Әсіресе ірі концерттерде тәртіп пен қауіпсіздік басты назарда болуы тиіс. Тұрғындар мен қонақтар мереке күндері алаңсыз серуендеп, көтеріңкі көңіл күйде демалуы үшін әрбір жауапты орган өз міндетін мұқият атқаруы қажет, – деді өңір басшысы.

Бұқаралық шаралар өтетін орындарда балалардың қауіпсіздігі үшін арнайы жоғалғандарды іздеу пункттері жұмыс істейді.

Құралай ЖҰМАҒАЛИҚЫЗЫ,

«QH»