Тамыз конференциясы 2025
Қарағандыда білім беру саласының басты дәстүрлі шарасы – тамыз конференциясы өтті. Биылғы жиын «Білім келешегі: адал азамат – кәсіби маман» тақырыбымен ұйымдастырылып, өңірдің ұстаздары мен білім саласының өкілдерін ортақ алаңда тоғыстырды.
Жиынға аймақ мектептері мен колледждерінің директорлары, тәжірибелі педагогтер, жас мамандар, ғылыми қауым өкілдері және жалпы саны 600-ден астам ұстаз офлайн қатысып, тағы 10 мыңға жуық тыңдарман Zoom және Facebook арқылы онлайн қосылды. Шараға облыс әкімі Ермағанбет Бөлекпаев модераторлық етті.
Конференция басталар алдында арнайы көрме ұйымдастырылып, онда білім саласына енгізіліп жатқан заманауи технологиялар мен инновациялық жобалар таныстырылды. Көрмеде робототехника үлгілері, интерактивті тақталар, электронды оқулықтар, цифрлық құралдар және жаңа бағдарламалық өнімдер көрсетіліп, педагогтерді оларды оқу үдерісінде тиімді пайдалануға шақырды. Мұндай бастамалар білім беру жүйесін заманауи талаптарға бейімдеуге жол ашатыны атап өтілді.
– Тамыз конференциясы – келешегіміздің негізін қалайтын маңызды басқосу. Ұрпақ тәрбиесі – баршамыздың ортақ борышымыз. Балаларымыздың саналы, білімді, елжанды болып өсуі үшін мемлекет те, қоғам да, ата-ана да, ұстаз да бірдей жауапты, – деді облыс басшысы Ермағанбет Бөлекпаев.
Білім басқармасы басшысының міндетін атқарушы Мейіржан Сыздықов өткен оқу жылында өңір оқушылары халықаралық және республикалық деңгейдегі олимпиадаларда, ғылыми жобалар байқауларында, спорттық және өнер сайыстарында үздік нәтижелер көрсеткенін атап өтті.
– Әрбір жетістік – облысымыздың абыройын асқақтатып қана қоймай, жас ұрпаққа үлкен үлгі болып отыр. Алдағы оқу жылында да білім сапасын арттыруға, инновациялық әдістерді енгізуге және балалардың әлеуетін толық ашуға күш саламыз, – деді ол.
Биылғы конференция аясында Қарағанды облысында жаңа ауқымды бастама «Кітап оқитын ұлт» жобасы ресми түрде іске қосылды. Жобаға мектеп оқушылары, студенттер, педагогтар, отбасылық әулеттер және мемлекеттік қызметшілер қатыса алады. Оның шарттары бойынша алты ай ішінде әр қатысушы кемінде 15 кітап оқуы тиіс. Ең белсенді оқырмандарға ақшалай сыйлықтар, сертификаттар және арнайы медальдар табысталады.
«Кітап оқитын ұлт» қорының атқарушы директоры Аян Сақошев жобаның негізгі мақсаты қазақстандықтардың оқу деңгейін жылына кемінде 10 кітапқа жеткізу екенін айтты.
– Байқау арқылы біз оқуға деген қызығушылықты арттырып қана қоймай, кітапты мектеп кезінен бастап тұрақты әдетке айналдыруды көздеп отырмыз, – деді ол.
Жоба қыркүйек айында басталып, оның қорытындысы 2026 жылдың наурыз айында шығарылады.
Облыс әкімі Ермағанбет Бөлекпаев «Кітап оқитын ұлт» жобасының мән-маңызына ерекше тоқталып, оның қоғам үшін өзектілігін атап өтті:
– Мемлекет басшысы Қасым-Жомарт Тоқаев оқу мәдениетін қалыптастыруды ұлттың прогрессивті ойлау жүйесінің негізі деп бағалады. Сондықтан бұл жобаны толық қолдап, кітапхана қызметін жетілдіру, оқушыларды, педагогтарды және ата-аналарды кітап оқуға кеңінен тарту маңызды, – деді.
Тамыз конференциясы педагогтердің кәсіби пікір алмасу, тәжірибе бөлісу және алдағы оқу жылына бағыт айқындайтын дәстүрлі алаңы. Биылғы жиынның негізгі идеясы адал азамат тәрбиелеу мен кәсіби маман қалыптастыру болса, қабылданған шешімдердің ішінде оқырмандық мәдениетті арттыруға бағытталған «Кітап оқитын ұлт» жобасы айрықша мәнге ие болды.
Ералы ҒАНИ,
«QH»