Тұрғындарға құқықтық кеңес, жастарға есірткі жайлы ескерту

Қарағандыда құқықтық мәдениетті арттыру мен есірткіге қарсы күресті күшейту бағытында кешенді шаралар өтті. Шаралар тұрғындарға практикалық көмек көрсету мен жастар арасында құқық бұзушылықтың алдын алуға арналды.

Қаланың «Таир» сауда қалашығында ұйымдастырылған ашық қабылдау алаңында құқықтық жәрмеңке өтті. Полицияның түрлі бөлімшесінің өкілдері көлікті тіркеу, құжат рәсімдеу, жүргізуші куәлігін алу, көші-қон тәртібі сияқты өзекті мәселелер бойынша азаматтарға нақты кеңестер берді. Сонымен қатар ішкі істер органдарында қызметке орналасу тәртібі, талаптар және мансаптық өсу мүмкіндіктері жөнінде толық ақпарат ұсынылды.

– Азаматтардың белсенділігі бізді қуантады. Бұл сенім мен өзара түсіністікті нығайтады, – деп атап өтті Қарағанды облыстық Полиция департаменті бастығының орынбасары Жасқайрат Қайыров.

Жастарға арналған кездесулер де назардан тыс қалмады. Жастар ресурстық орталығының алаңында «Жасыл ел» еңбек жасағының мүшелерімен есірткіге қарсы профилактика тақырыбында ашық әңгіме өтті. Полиция подполковнигі Бақытжан Мұстафаев синтетикалық есірткілердің жаңа түрлерінің қауіптілігі туралы айтып, олардың жасырын таралу жолдарын түсіндірді. Кинологиялық қызмет мамандары өз тәжірибелерін бөлісіп, жастардың сұрақтарына жауап берді.

– Жастар өз денсаулығын ғана емес, заңды да ойлауы қажет. Біз оларға тыйым салынған заттардың зардабын ашық айтуымыз керек, – деді Бақытжан Мұстафаев.

Бұл шаралар қоғамдық қауіпсіздікті қамтамасыз ету, құқықтық тәртіпті нығайту және тұрғындар арасында құқықтық сауаттылықты арттыру бағытындағы жүйелі жұмыстың жалғасы болып отыр.

Құралай КӨБЕНОВА,

«QH»