Тұрғын үй-коммуналдық шаруашылық саласындағы реформа

Еліміздің тұрғын үй-коммуналдық шаруашылық (ТКШ) саласында ауқымды өзгерістер орын алуда. Президент ТКШ саласына қатысты заңнамалық актілер мен Әкімшілік кодекске түзетулер енгізетін жаңа заңға қол қойды. Ендігі жерде көппәтерлі тұрғын үйлерді басқарудың жай серіктестік нысаны заң жүзінде жойылып, оның орнына тек екі басқару түрі – Меншік иелері бірлестігі (МИБ) және Тікелей бірлесіп басқару (ТББ) ғана сақталады.

Бүгінде республика көлемінде 7 мыңнан астам МИБ құрылып үлгерді. Бұл құрылым – меншік иелерінің заңды тұлға ретінде бірлесе әрекет етіп, үйді ұжымдық басқаруын көздейді. Ал ТББ моделі тұрғындарға қарапайым жолмен басқару мүмкіндігін береді: заңды тұлға құрмай-ақ, банк шотын ашпай-ақ және басқарушы компания жалдамай басқаруға болады.

Алайда, пәтер санына қарай ТББ екіге бөлінеді:

Егер үйде 36 пәтерден аз болса, тұрғындар басқару субъектісінсіз өз бетінше үйді басқара алады;

Ал 36 пәтерден көп болған жағдайда, міндетті түрде ПИК (пәтер иелері кооперативі), басқарушы компания немесе кәсіби басқарушыны келісімшарт негізінде тартуы тиіс.

Айта кету керек, ПИК әлі де басқару субъектісі ретінде жұмыс істей алады. Олар кәсіби басқарушылармен және басқарушы компаниялармен қатар МИБ-пен келісімшарт бойынша қызмет көрсетуі керек.

Сонымен қатар, Әкімшілік кодекске енгізілген өзгерістерге сәйкес, тұрғын үйлерге дер кезінде банк шотын ашпау, ай сайынғы және жылдық есепті тұрғындарға уақытылы ұсынбау сияқты заңбұзушылықтар үшін айыппұлдар қарастырылған.

Бұл заң – ТКШ саласын жүйелеуге, ашықтық пен тұрғындар жауапкершілігін арттыруға бағытталған маңызды қадам.

Құралай ЖҰМАҒАЛИҚЫЗЫ,

«QH»