Сырт алаңдағы сенімді жеңіс

Қарағандының «Шахтер» командасы Қазақстан Бірінші Лигасының кезекті турында сырт алаңда SD Family клубын 0:2 есебімен тізе бүктірді.

Ойынның алғашқы жартысында алаң иелері белсенділік танытқанымен, нәтижеге қол жеткізе алмады. Оның үстіне SD Family ойыншылары бірнеше рет  тәртіп бұзушылықпен көзге түсіп алғашқы таймның өзінде 3 мәрте сары қағазбен жазаланды.

Екінші таймда қонақтар өздерінің тәжірибесі мен шеберлігін көрсетті. Шабуылшы Арман Нүсіп 68-минутта әдемі соққымен есеп ашса, 77-минутта дубль авторы атанып, матч тағдырын шешті. Қалған уақытта қарағандылықтар допты бақылауда ұстап, қорғаныста сауатты ойнады. Осы қос голдың арқасында Арман, чемпионаттың сұрмергендер тізімінде екінші орынға көтерілді.

Бұл жеңіс «Шахтерге» турнирлік кестеде өз орнын сақтап қалуға мүмкіндік берді. Команда қазір өз мақсатын айқын көрсетіп, көшбасшылар қатарына қосылуға талпынып келеді.

Енді қарағандылық «Шахтер» келесі ойынды өз алаңында «Хан Тәңірі» клубын қабылдайды. Чемпионаттағы әр тур бәсекеге толы өтіп жатыр. Маусым соңында тек екі ғана команда Жоғары лигада ойнауға мүмкіндік алады. Сондықтан «Шахтер» үшін әр ойын финалмен тең десе де болады.

Ералы ҒАНИ,

«QH»