Шығармашылық пен өнер тоғысы
Қарағанды қаласында шығармашылық пен шабытқа толы ерекше форматтағы жаңа мәдени шара ARQA Fest фестивалі өтті. Қала әкімдігінің қолдауымен ұйымдастырылған бұл жоба жергілікті тұрғындар мен қала қонақтары үшін жаздың жарқын оқиғасына айналды.
ARQA Fest музыка және шабыт фестивалі Қарағандыда алғаш рет ұйымдастырылған кең ауқымды мәдени шара. Оның мақсаты – қаланың шығармашыл жастарын, жергілікті өндірушілер мен дизайнерлерді, сондай-ақ отбасылар мен өнерсүйер қауымды бір алаңда біріктіру.
Фестиваль аясында бірнеше бағыт қамтылды. Алғашқысы «Қарағандыда жасалған» жәрмеңкесі, онда қолөнер бұйымдары, заманауи киімдер мен аксессуарлар, зергерлік бұйымдар ұсынылды. Келушілер түрлі шеберлік сағаттарына қатысып, жергілікті шеберлермен тәжірибе алмаса алды. Бұл алаң шағын және орта кәсіп иелері үшін өз өнімдерін кең аудиторияға таныстыруға таптырмас мүмкіндік болды.
Музыкалық бағыт та кеңінен қамтылды. Сахнада қазақстандық эстраданың танымал орындаушыларымен қатар, Қарағандының жергілікті әртістері де өнер көрсетті. Күні бойы өткен концерттік бағдарлама мен DJ жиынтығы келушілерге көтеріңкі көңіл-күй сыйлады.
Фестивальдің басты идеясы Арқа төсіндегі шығармашылық пен мәдениетті қолдау болды. Бұл шара тек қарағандылықтарды ғана емес, облыс тұрғындарын да бір алаңға тоғыстырды. Ашық аспан астында өткен поэзиялық кеш, музыкалық терапия, балаларға арналған шеберлік сағаттары, фотобұрыштар мен қолөнер көрмелері еркін әрі шығармашылық атмосферада ұйымдастырылды.
Фестивальдің ерекше символына айналған текемет оюы да келушілердің ерекше қызығушылығын тудырды. Қызығушылық білдірген адамдар өз оюын қиып, «ARQA Fest» жазуымен біріктіріп, үлкен плакат жасап шықты. Бұл туынды кешкі концерттің басты көрнекі белгісіне айналды.
– Шараның мақсаты – қарағандылықтарды қолдау. Бұл шығармашылық адамы болсын, мәдениет адамы болсын немесе кәсіпкерлер болсын, барлығын бірауыздан қолдау. Біз тек қаланы емес, облыс төңірегіндегі адамдарды да ескердік. Өйткені барлығымыз Арқа жерінде өмір сүреміз. Сол себепті де фестивальге «ARQA Fest» деген атау берілді, – деді фестиваль ұйымдастырушысы Думан Әкім.
Фестивальде ұсынылған өнімдердің ішінде отбасылық кәсіптер де ерекше көзге түсті. Солардың бірі – Қасымбектер отбасы. Қазақы нақыштағы заманауи киім үлгілерімен танылған бұл жанұя шығармашылықты бір арнаға тоғыстырып келеді. Идея авторы – анасы, ал символикалар мен графикалық әрлеумен әкесі мен інісі айналысады. Дизайн жұмыстары анасы мен қызының қолында.
– Біздің отбасымызда менің анам бұл бизнестің басшысы. Барлық киімдердің дизайндарын анам ойлап табады. Әкем шапандағы оюларды техниканың көмегімен салып, түрлендірумен айналысады. Інім екеуміз ата-анамызға қолғабыс етеміз, – дейді фестивальге қатысушы Ақбота Қасымбек.
Ақбота – болашақ дизайнер. Университетте осы мамандықта білім алып жүрген ол жануар пішініндегі ерекше сөмкелер жасап, көпшіліктің назарын өзіне аударды. Әр сөмкенің көзі, мұрны мульткейіпкерге ұқсас етіп жасалған. Бұл туындылар автордың ішкі дүниесін бейнелейді. Ақбота бала кезінен жануарларды жақсы көретінін, сөмке тігу жүрек қалауымен келген сүйікті ісі екенін айтты.
Фестиваль аясында ұйымдастырылған этно және заманауи фотозоналар, интерактивті өнер кеңістіктері мен тақырыптық кітап көрмесі де көпшіліктің қызығушылығына ие болды.
ARQA Fest – бұл тек мереке ғана емес, Қарағандының мәдени өміріне серпін берген жаңа дәстүрдің бастауы. Ол қаланың шығармашылық әлеуетін көрсетіп қана қоймай, тұрғындар мен қонақтарды біріктірген, шабыт пен серпіліс сыйлаған ерекше мәдени алаңға айналды.
Ералы ҒАНИ,
«QH»