Шахтердың жаңа маусымға дайындығы
Қарағандылық «Шахтер» футбол клубы Түркияда өтіп жатқан оқу-жаттығу жиындарының бірінші кезеңін сәтті аяқтады. Жерлестер бұл кезеңде екі жолдастық кездесу өткізді. Бірінші ойынында команда Мажарстанның «Будапешт Гонвед» клубымен кездесіп, сенімді ойын көрсетіп, 2:0 есебімен жеңіске жеткен еді. Ал осы жолғы қарсыластар – Косовоның «Фероникели» клубы, олармен ойында команда тең нәтижеге қол жеткізді.
«Фероникели» – Косовоның Бірінші лигасында ойнайтын кәсіби клуб. 2014-2015 жылғы маусымда алғаш рет ел чемпионы атанып, кубокты өздерінің төбелеріне көтерген. Содан кейін 2016 және 2019 жылдары тағы да чемпион атанып, өз тарихында алғаш рет УЕФА Чемпиондар лигасының квалификациясына жолдама алған. Жалпы «Фероникели» үш дүркін Косово чемпионы және үш мәрте Косово Кубогының жеңімпазы.
Түркиядағы жолдастық кездесуде «Шахтер» ойыншылары жоғары деңгейде өнер көрсетіп, қарсыластарымен тең ойын көрсетті. Ойынның 9-минутында команда қорғаушысы Ален Айманов есеп ашу мүмкіндігінен айырылды. Шабуыл барысында қарсыласынан допты алып, қақпаға соққы жасады, алайда доп аяғына дұрыс тимей, соққы нәтижесіз болып қалды. Қақпашы қарсылас допты еш қиындықсыз қайтарды.
23-минутта қарсыластардың есепте алға шығу мүмкіндігі туды. Жартылай қорғаушы Бахтири Крешник «Шахтер» қақпашысы Никита Килджиевпен жеке шығып, мүмкіндікті пайдалана алмады. Алайда жерлестер қорғаушысы Роман Божко қарсылас ойыншысын жейдесінен тартып, шабуылды тоқтатты. Нәтижесінде төреші Романға «қызыл» қағаз көрсетіп, алаңнан шығарды. Қарсыластары бұл мүмкіндікті тиімді пайдалана алмады.
Ойынның 50-минутында «Шахтер» тағы да гол соғуға жақын болды. Оң қапталдан әуелете көтерілген допты қарсылас қорғаушылар кері қайтарды. Осы кезде кері қайтқан допқа бірінші болып жеткен Аңсар Алтынхан қақпаға соққы жасады, алайда доп әріптесі Дәулет Зайнетдиновқа тиіп, алаңнан шығып кетті.
Осылайша, қарағандылық «Шахтер» Түркияда өткен оқу-жаттығу жиынының бірінші кезеңін тең нәтижемен аяқтады. Команда енді бір апталық демалысқа шығып, дайындықтарын толықтырады. Ал бір аптадан кейін оқу-жаттығу жиынының екінші кезеңі басталады, ол да Түркияның жылы ауа райында өтеді. Команданың бапкерлері мен ойыншылары екінші кезеңде тактикалық ойынды жетілдіруге, физикалық даярлықты арттыруға және жаңа ойын комбинацияларын тәжірибеден өткізуді жоспарлап отыр.
Түркиядағы оқу-жаттығу жиындары «Шахтер» үшін маусым алдындағы маңызды дайындық кезеңі. Клуб жанкүйерлері команданың өз ойынын одан әрі жақсарта түсетініне үмітті.
Ералы ҒАНИ,
«QH»