«Шахтер» жанкүйерлерін қуантты

Қарағандының басты футбол мақтанышы «Шахтер» клубы өз алаңында кезекті ойынын өткізді. Қарсылас – лигадағы тәжірибелі ұжымдардың бірі саналатын Екібастұз командасы. Жерлестеріміз төрт жауапсыз гол соғып, футбол жанкүйерлеріне нағыз мереке сыйлады.

Бірінші минуттардан-ақ «Шахтер» ойын тізгінін өз қолына алды. Қорғаныстағы сенімділік пен ортадағы жинақы комбинациялар шабуылға жиі шығуға мүмкіндік берді. 13-минутта Сұлтан Сағнаев айып алаңы ішінде сәтті пас беріп, Максим Галкин мергендігімен көзге түсіп есеп ашылды. Бұл голдан кейін қарсыластардың шабуылы бәсеңдеп, алаң иелері толықтай үстемдік жүргізді. 42-минутта Артем Нүсіптің дәл пасынан кейін Галкин тағы бір гол соғып, дубль авторы атанды. Осылайша командалар 1-таймды 2:0 есебімен аяқтады.

Үзілістен кейін де қарағандылықтар ойынды өз бақылауында ұстап, 47-минутта Артем Литош қақпашыны қапы қалдырып, есепті 3:0-ге жеткізді. Бұл сәттен кейін қарсыластардың қысымы бәсеңдеп, алаң иелері еркін қимылдады.

84-минутта Максим Галкин Артем Литоштың тамаша пасын пайдаланып, хет-трик жасап, матчтағы соңғы нүктені қойды. Галкин бұл ойында команда үшін маңызды адам екенін көрсетіп, үш гол соғып, үздік ойыншы атағын иеленді.

Матч барысында тек голдар ғана емес, қызу эмоциялар да болды. Шахтер сапында бірнеше ойыншы қызыл қағаз алып, команда матчтың бір бөлігін аз ойыншымен өткізді. Дегенмен бұл жағдай ойын тағдырына әсер еткен жоқ.

Стадионға жиналған жанкүйерлер ойын бойы команданы қолдап, ерекше атмосфера қалыптастырды. Шахтердің бұл жеңісі турнирлік кестедегі жағдайын нығайтып қана қоймай, алдағы ойындарға деген сенімді де арттырды.

Ералы ҒАНИ,

«QH»