«Шахтер» Павлодарда сүрінді

Қарағандылық «Шахтер» Қазақстан Бірінші лигасының кезекті турында сырт алаңда «Ертіс» командасынан жеңіліп қалды. Павлодардағы тартысты кездесудің есебі – 3:1.

Матчтың алғашқы минутынан-ақ алаң иелері белсенділік танытты. 7-минутта Ертіс ойыншысы Еркебұлан Тұңғышбаев есеп ашты. Ал 42-минутта Тамерлан Ағыманов айырмашылықты екі допқа жеткізді. Екі голдың да ассистенті – Нұрсұлтан Берібаев.

«Шахтер» екінші таймда ойын тізгінін қолға алуға тырысты. 75-минутта Диас Қалыбаевтың дәл соққысымен есеп 2:1-ге өзгерді. Бірақ бұл гол қонақтардың үмітін толық оята алған жоқ. 89-минутта Еркебұлан Тұңғышбаев дубль жасап, «Ертістің» жеңісін түйіндеді.

Матч барысында бірнеше ойыншы ескерту алды. Қарағандылықтардан Богдан Савкив пен Сұлтан Шымырхан және Артем Литош сары қағаз иеленді.

Айта кетейік, бұл ойыннан кейінгі турнирлік кестеде өзгерістер орын алды. Жергілікті командамыз төртінші орынға түсіп қалды. Маусым аяқталғанда тек бастапқы екі команда ғана Жоғары лигаға жолдама алатын болады. Сондықтан кеншілерге бар күш-жігерін салып, соңына дейін тырысып ойнау керек. Бұл жергілікті жанкүйерлердің талап тілегі.

Келесі турда «Шахтер» өз алаңында Екібастұз командасымен кездеседі. Жеңісті күндерде жүздескенше жерлестер!

Ералы ҒАНИ,

«QH»