Сауда орталығындағы шынайы оқу-жаттығу
Қарағандыдағы «Global City» сауда-ойын-сауық орталығында төтенше жағдай кезінде әрекет етуге бағытталған өрт-тактикалық оқу-жаттығу өтті. Шара барысында өрт шыққан жағдайда адамдарды эвакуациялау, жалынды сөндіру және жедел қызметтердің үйлесімді әрекеті пысықталды. Оқу-жаттығуға төтенше жағдайлар басқармасы, жедел медициналық жәрдем және полиция бөлімдерінің мамандары қатысты.
Оқу-жаттығу барысында 170 адам қауіпсіз жерге эвакуацияланды. Шараға Төтенше жағдайлар басқармасынан 63 маман мен 16 арнайы техника жұмылдырылды. Сонымен қатар, «Қарағанды Жарық», «Қарағанды Су», полиция, жедел медициналық көмек және коммуналдық қызмет өкілдері де атсалысты. Мамандардың айтуынша, жаттығудың басты мақсаты – өрт кезінде жедел әрекет ету, эвакуация жұмыстарын үйлестіру және қызметтер арасындағы өзара іс-қимылды жетілдіру.
– Бізде мұндай оқу-жаттығу шаралары тұрақты түрде ұйымдастырылып отырады. Негізгі назарымызды халық көп шоғырланатын нысандарға, атап айтқанда – ірі сауда орталықтары, денсаулық сақтау ұйымдары мен білім беру мекемелеріне аударамыз. Себебі мұндай нысандарда өрт жүктемесі жоғары болып келеді және олардың ішкі жоспарлануы күрделі. Өрт шыққан жағдайда ең алдымен 101 немесе 112 жедел қызмет нөмірлеріне дереу қоңырау шалу қажет. Бұл қызметтер тәулік бойы үздіксіз жұмыс істейді. Бұдан кейін жедел түрде адамдарды эвакуациялау шараларын қолға алу керек. Ең маңыздысы – адам өмірі мен қауіпсіздігін бірінші орынға қою, – деді Қарағанды қалалық төтенше жағдайлар басқармасының басшысы Бауыржан Хабдуллин.
Өрт сөндіру қызметі жедел әрекет ету дағдыларын шыңдауда. Оқу-жаттығу барысында мамандар сауда кешенінде шартты өртті сөндіру және адамдарды құтқару бойынша кәсіби іс-қимылдарын пысықтады. Шұғыл жағдай кезінде өрт сөндіру бөлімшелері автосаты арқылы кешеннің шатырына көтеріліп, шартты жану ошағын анықтады. Түтін басқан аумақта газдан және түтіннен қорғау қызметі іздестіру-құтқару жұмыстарын жүргізіп, зардап шеккен азаматтарға алғашқы медициналық көмек көрсетілді.
– Оқу-жаттығу сауда нысанында өрт шыққан жағдайда әкімшілік пен келушілердің іс-қимыл алгоритмін үйрету мақсатында ұйымдастырылды. Сонымен қатар, бұл шара барысында өрт сөндірушілердің полиция, жедел жәрдем және басқа да жедел қызметтермен өзара іс-қимылы пысықталды. Жаттығу сәтті өтті деп ойлаймын. Егер осындай нысандарда төтенше жағдай туындай қалса, біз оны сөндіруге және адамдарды құтқаруға толық дайынбыз, – дейді Қарағанды қалалық төтенше жағдайлар басқармасының аға-инженері Темірлан Несіпбай.
Қарағандыда өткен оқу-жаттығу төтенше жағдайлардың алдын алу және жедел әрекет ету жүйесін жетілдіруге бағытталды. Мамандардың айтуынша, мұндай шаралар тосын жағдайда адам өмірі мен денсаулығын сақтап қалуда шешуші рөл атқарады. Қарағанды қалалық төтенше жағдайлар басқармасының басшысы оқу-жаттығудың маңыздылығын атап өтті.
Қанағат ЖИЕНҚҰЛОВА,
«QH»