Сәулет-құрылыс саласындағы лицензиялау қорытындысы
Қарағанды облысында сәулет-құрылыс саласындағы мемлекеттік бақылау жалғасып жатыр. 2025 жылдың алғашқы жартыжылдығында облыстық мемлекеттік сәулет-құрылыс бақылауы басқармасы лицензия беру мен қадағалау шаралары бойынша қорытындысын жариялады. Аталған басқарма – құрылыс сапасын қамтамасыз етуге жауапты негізгі орган. Құрамында 11 маман бар, оның алтауы инспектор. Барлығы жоғары инженерлік-техникалық білімі бар және әр үш жыл сайын міндетті аттестаттаудан өтеді.
Басқарма 2025 жылдың алғашқы алты айында 360 рұқсат құжатын рәсімдеген. Оның ішінде 200 лицензия құрылыс-монтаж жұмыстарына, 58 лицензия жобалау қызметіне, 28 лицензия іздестіру қызметіне берілген. Жобаларды басқару бойынша құжаттар былтырғы жылмен салыстырғанда үш есе артқан.
– Осы кезеңде 73 өтініш берушіге лицензия беруден бас тартылған. Бас тартудың басты себебі лицензиаттар мен сарапшылардың біліктілік талаптарына сай келмеуі. Бас тарту көрсеткішін азайту үшін ӘРПК тәртібіне сәйкес тыңдау рәсімі енгізілді. Бұл ашықтықты арттырып, өтініш берушілердің құқықтарын қорғауға және шағымдар санын азайтуға мүмкіндік берді. Қызметтердің барлығы электронды форматқа көшірілген. Барлық өтініштер eLicense.kz порталы арқылы қабылданады. Мерзімнің бұзылуы немесе шағым түсу деректері тіркелмеген. Техникалық қадағалау бойынша аттестат алу да электронды түрде жүргізіледі. Бірінші санаттағы аттестатты алу үшін 100 сұрақтың кемінде 90-ына дұрыс жауап беру қажет, ал екінші және үшінші санат үшін 70 сұраққа дұрыс жауап жеткілікті. Талапқа сай нәтиже көрсетпегендер емтиханды қайта тапсыра алады. Бұл ретте өтініш берушілерге ешқандай шектеу қойылмайды, – дейді Тілек Елубай.
Басқарма мамандары мемлекеттік қызмет сапасын арттыруды басты міндет санайды. Ол үшін онлайн және офлайн кеңестер өткізіліп, қызметкерлерге оқыту семинарлары тұрақты ұйымдастырылып келеді.
Ералы ҒАНИ,
«QH»