Полиция онлайн-алаяқтардан қорғанудың тиімді тәсілдерін атады
Интернет пен цифрлық сервистердің қарқынды дамуы онлайн-алаяқтыққа да жол ашып отыр. Қарағанды облысында киберқылмыс көрсеткіші әлі де төмендемей тұрғанын құқық қорғау органдары мәлімдеді. Аймақтық коммуникациялар қызметінде өткен баспасөз конференциясында полицейлер интернет-алаяқтардан қорғанудың нақты жолдарын түсіндірді.
Құқық қорғаушылардың айтуынша, алаяқтар қолданатын схема күн сайын өзгеріп, түрленіп келеді. Олар өзін банк немесе мемлекеттік орган қызметкері ретінде таныстырып, азаматтардың жеке деректерін алуға тырысады, «жоғары табыс әкелетін инвестиция» ұсынып арбайды немесе фишингтік сілтемелер арқылы қаржысына қол сұғады.
Октябрь аудандық полиция бөлімінің бастығы Арман Меллятовтың айтуынша, Ұлттық банк енгізген дерек алмасу платформасы алаяқтықты тежеудің тиімді құралы болып отыр. Антифрод-орталық күмәнді транзакцияларды нақты уақыт режимінде анықтап, бұғаттайды және ел бойынша бірыңғай «қара» және «сұр» тізімдер негізінде жедел шаралар қолданады.
«Банктер ақпаратты құқық қорғау органдарына жолдайды. Егер тексеру нәтижесінде әрекеттің алаяқтар тарапынан жасалғаны дәлелденсе, қаражат иесіне қайтарылады. Қазіргі уақытта шамамен 35 миллион теңге тұрғындарға өтелді. Алаяқтардың жаңа тәсілдері пайда болған сайын, біз де қарсы шараларды күшейтеміз», – деді Арман Меллятов.
Полиция қызметкерлері киберқауіпсіздік бағытында бірнеше технологиялық шешім енгізілгенін атап өтті. Биыл фишингтік сайттарды анықтайтын жүйе арқылы 7 мыңнан астам жалған интернет-ресурс бұғатталған. Сондай-ақ шетелдік нөмірлерден түсетін күмәнді қоңырауларды тіркеп, дереу тоқтататын арнайы кол-орталық жұмыс істейді.
Михайлов полиция бөлімінің бастығы, майор Айбек Алпысбаев тұрғындарға қарапайым, бірақ маңызды ережелерді естен шығармауды ескертті.
«Күмәнді сілтемелерге өтпеңіздер, жеке деректерді енгізбес бұрын сайттың түпнұсқалығын тексеріңіздер. Банк пен полиция қызметкерлері ешқашан телефон арқылы несие рәсімдеуді талап етпейді», – деді ол.
Құқық қорғаушылардың айтуынша, қырағылық таныту, қаржылық ақпараттың дұрыстығын тексеру және жеке деректерді құпия ұстау – онлайн-алаяқтардан қорғанудың ең сенімді жолы болып қала береді.
Қанағат ЖИЕНҚҰЛОВА,
«QH»