Поэзия – жанның емшісі
Облыстық кітапханада өлеңсүйер қауым «Поэзия терапиясы» атты ерекше кеште бас қосты. Әдеби шара барысында қатысушылар рухани тынығып, қазақ поэзиясының тереңіне бойлады.
«Поэзия терапиясы» жобасы Қарағандыда үшінші мәрте ұйымдастырылып отыр. Бұл шараны отбасылық шығармашылық жоба деуге болады. Себебі, ұйымдастырушы Мариям Ахметбектің жұбайы да, қызы да өнерден алыс емес. Кеште отбасының рухани бірлігі мен өнерге деген сүйіспеншілігі ерекше сезілді.
– Менің поэзияға деген махаббатым осындай кештерді өткізуге шабыттандырады. Поэзия әлемі – нәзік әлем. Ұлы тұлғалардың, ақындардың өлеңдерін оқу арқылы адамдардың санасына жақсы ой салғым келеді. Әр адамның санасында шешімін таба алмай жүрген сұрақтары болады. Поэзия сол сұрақтардың жауабын табуға көмектеседі, – дейді «Поэзия терапиясы» кешінің ұйымдастырушысы Мариям Ахметбек.
Мариям Ахметбектің айтуынша, қазақ әдебиеті мен поэзиясын жиі оқитын адамның ойлау қабілеті терең болады. Ол өмірге жеңіл қарап, кез келген қиындықтың оң шешімін таба алады.
Кеш басталар алдында дәстүрге айналған медитация жасалды. Тыңдармандар көзін жұмып, тыныс алу жаттығуларын орындады. Ұйымдастырушылардың пікірінше, бұл әдіс поэзияны тереңірек сезінуге көмектеседі.
– Көп адам өзімен оңаша қала алмайды. Ал тыныштықта қалып, өзіңмен жұмыс жасау – ең мықты терапия. Өзін таба алмай жүрген жандар үшін өлең нағыз ем. Қазақ әдебиетімен сусындаған адамға тіпті психологтың көмегі де қажет болмайды, – дейді Мариям Ахметбек.
Мариям көркемсөз оқуға үйрететін арнайы үйірме де жүргізеді. Сол үйірме оқушылары да кеште өнер көрсетті. Олардың өлең оқуы мен сахналық шеберлігі көрерменге ерекше әсер қалдырды.
Жас қатысушылардың бірі Айзере Амантай өз әсерімен бөлісті.
– Мен Мариям Наурызбайқызынан өлеңді нақышына келтіріп оқуды үйреніп жүрмін. Ол кісі менің поэзияға деген махаббатымды оятты. Қазір поэзияның арқасында ортамда абыройлымын. Облыс аумағында ғана емес, еліміздің түкпір-түкпірінен дос тауып үлгердім, – дейді ол.
Кеш қонақтары бұл шараның тек өлең тыңдау емес, нағыз рухани тынығу екенін атап өтті. Ұйымдастырушылар жобаны алдағы уақытта да жалғастырып, қазақ поэзиясын насихаттауды көздеп отыр.
Ералы ҒАНИ,
«QH»