Қос мергеннің жеңісі

Ақтауда өткен дәстүрлі садақ атудан әлем чемпионаты қазақ жастарының жаңа толқынының шыңдалғанын айқын көрсетті. Қазақстан, Қырғызстан, Өзбекстан және Ресейден келген 70-тен астам спортшының арасында қазақстандық өрендер ерекше көзге түсті. Олардың қатарында қарағандылық сопртшылар Аиша Баймырза мен Жансұлтан Марат та бар. Екеуі де жүлделі орыннан көрініп, ел абыройын асқақтатты.

Аиша 20 метр қашықтықтан қалқан нысанаға ату сайысында бақ сынап, күміс медальға қол жеткізді. Қарсыластары да өз елдерінің чемпиондарынан құралған мықты спортшылар болды. Соған қарамастан жас спортшы сабырлы қалпын сақтап, әр оғын дәлдікпен атып, үздіктердің қатарынан табылды.

– Жарыс кезінде толқу да, қызығушылық та болды. Әрбір атуым сынақ болды. Бірақ өзіме сеніп, барынша жинақталдым. Бұл күміс жүлде үлкен жетістік әрі болашаққа деген ынтамды арттырды, – дейді жас спортшы.

Аиша небәрі екі жылдан бері садақ атып келеді. Қазірдің өзінде Қазақстан чемпионатында қола, ал әлемдік деңгейде күміс жүлде еншілеген мерген қыз болашағынан зор үміт күттіретін спортшылардың бірі.

Жарыста ер балалар да жоғары деңгейде өнер көрсетті. Солардың ішінде Жансұлтан Марат та бар. Ол әлем чемпионатының жүлдегері атанып, мергендік өнерде өзінің шеберлігін дәлелдеді.

– Дайындық жақсы болғанымен, жарыс алаңында бәрі ойдағыдай бола бермейді. Себебі төрешілер әрбір қимылды жіті бақылайды. Бұл кейде қатысушыларға қысым түсіреді. Соған қарамастан, барымды салуға тырыстым, – дейді ол.

Жансұлтанның айтуынша, бұл спорт түрі тек көздің дәлдігін ғана емес, жүйке жүйесінің мықтылығын да сынайды. Жарыс кезінде әрбір оғынан кейінгі толқу мен жауапкершілікті еңсеру нағыз спортшыға тән қасиет.

Садақ ату – халқымыздың тарихымен біте қайнасқан өнер. Орта ғасырдағы деректерде көшпенділердің мергендігін сынау үшін мал терісін нысанаға қойғаны, ал мергендердің құралайды көзге атқан дәлдігімен бағаланғаны жазылады.

Бүгінде бұл спорт жаңаша дамып, олимпиадалық бағдарламаның да бір бөлігіне айналды. Дәстүр мен қазіргі спорттың үйлесімі жастардың бойында төзімділік пен рухани күш қалыптастырып келеді.

Аиша Баймырза мен Жансұлтан Мараттың жеңісі қазақ мергендігінің жаңа белесі. Бірі нәзік жанды қыздардың қайсарлығын дәлелдесе, екіншісі жас жігіттердің батылдығын көрсетті. Екеуінің де табысы Қазақстанның спорттағы беделін арттырған ортақ жеңіс.

Ақтаудағы әлем чемпионаты қазақ жастарының ата-баба дәстүрін жалғап қана қоймай, оны әлемдік деңгейде дәріптеп жүргенінің айқын дәлелі болды.

Ералы ҒАНИ,

«QH»