Қос байқау – бір шабыт
Қарағандыда бір күнде фотографтар мен суретшілер арасында екі бірдей шығармашылық байқау өтті. Қатысушылар туған өлкенің көркем табиғаты мен рухынан шабыт алып, үздік туындыларын ұсынды. Көрме мен марапаттау рәсімі өнер сүйер қауымды бір арнаға тоғыстырып, түрлі жастағы талантты жандардың басын қосты. Жеңімпаздар арнайы марапаттармен марапатталып, шығармашылық ізденістеріне жаңа серпін алды.
«Менің Отаным» атты фотобайқауға 14 пен 16 жас аралығындағы 40 жасөспірім қатысты. Олар Қарағандының ең сүйікті және ерекше сәттерін объектив арқылы жеткізуге талпынды. Байқау нәтижесінде үздік деп танылған 25 жұмыс арнайы көрмеге қойылып, көпшіліктің назарына ұсынылды. Сонымен бірге, 18 жастан асқан суретшілер арасында да шығармашылық сайыс ұйымдастырылып, 12 үміткер өз өнерлерін көрсетті. Бұл шаралар қаламыздың мәдени өміріне жаңа серпін берді.
– «Қарағандылық вернисаж» атты жобаны жүзеге асырудамыз. Жоба аясында екі конкурс өтіп, бүгін олардың нәтижелері жарияланады. Байқауға 40-тан астам шығармашылық ұсыныс келіп түсті. Кәсіби қазылар алқасының шешімімен 25 фотосурет таңдап алынып, облыстық саябақта көрме ұйымдастырылды. Бұл шара қала тұрғындары мен қонақтарына ерекше мәдени кеш сыйлайтынына сенімдіміз, – деді Қарағанды облысы кәсіпкерлер одағының атқарушы директоры Серік Санаубаев.
Фотобайқауда екінші орынды 16 жастағы Валерия Недоборская жеңіп алды. Табиғат пен жануарларға деген шынайы құштарлығы оны өнерімен бөлісуге және байқауға қатысуға ынталандырды. Валерияның объективі арқылы көрермендер табиғаттың ерекше сәттері мен жануарлардың әлеміне бойлайды.
– Мен отбасыммен және сүйікті итім Миламен 21-шағын ауданда серуендеп жүрдім. Сол сәтте күн батар шақта суретке түсіп, оны жарияладық. Мен жануарларды табиғат аясында суретке түсіруді жақсы көремін, өйткені үйде мысықтарым, иттерім, құстарым бар. Осындай іс-шаралардың ұйымдастырылуы өте маңызды деп ойлаймын – бұл адамдардың жаңа дүниелерді ашуына, айналаны танып-білуіне, яғни өздері тұрып жатқан орта жайлы көбірек білуіне мүмкіндік береді, – дейді фотобайқаудың жүлдегері Валерия Недоборская.
Суретшілер байқауының жеңімпазы – Ерсін Темірғалиев болды. 16 жыл бойы сурет салумен айналысып келе жатқан ол байқауда ерекше символикалық композициясын ұсынды. Оның туындысында орталықта қыран бейнесі бар қанатты домбыра, артқы фонда Астананың көріністері мен киіз үй, ал алдыңғы жақта жылқылар бейнеленген. Ерсін бұл күрделі жұмысты небәрі екі сағат ішінде аяқтағаны ерекше әсер қалдырды.
– Сурет өнеріне қызығушылық танытып жатқандардың санының артуы үлкен қуаныш. Өйткені жаз бойы үшінші рет конкурс өткізіліп жатыр, бұған дейін мұндай белсенділік болған емес. Жақында ғана Абай Құнанбайұлының 180 жылдығына арналған «Абай әлемі суретші көзімен» атты байқау ұйымдастырылып, онда да 15-ке жуық суретші өз туындыларын ұсынды. Қазір басталып жатқан бұл жоба – осындай ірі өнер шараларының екінші бірігуі іспетті. Бұл үрдіс жалғаса берсе екен деген үлкен үміт бар, – дейді суретшілер байқауының жеңімпазы Ерсін Темірғалиев.
Байқаулар салтанатты марапаттау рәсімімен мәреге жетті. Барлық қатысушыға мақтау қағаздары, дипломдар мен естелік сыйлықтар табысталып, жеңімпаздар мен жүлдегерлерге ақшалай сыйлықтар мен арнайы марапаттар берілді. Ұйымдастырушылардың айтуынша, мұндай мәдени шаралар алдағы уақытта да үздіксіз жалғасады.
Қанағат ЖИЕНҚҰЛОВА,
«QH»