Оқу-жаттығу шарасы өтті
Төтенше жағдайлар қызметінің қысқы қыспаққа қарсы тұруға қаншалықты қауқарлы екені бағаланды. «Қыс-2021» Республикалық командалық-штабтық оқу-жаттығу шарасы біздің қалада қарашаның 11,12 күндері жалғасын тапты. Төтенше жағдайлар департаментінің мамандары азаматтық қорғау, апаттыққұтқару құрамаларының, жылжымалы басқару пунктінің және шатырлы лагерьдің дайындығын тексерді. Зәулім ғимараттардағы өрттерді сөндіру мүмкіндіктері көрсетілді.
Сонымен қоса, қысқы кезеңде туындайтын төтенше жағдайларда, мәселен, қар кептелісінде , қолайсыз ауа райында азаматтарға көмек көрсету, құтқару жұмыстарын қалай жүргізу керектігі пысықталды. Қарағанды облысы Төтенше жағдайлар департаментінің баспасөз қызметі мәліметінше, тактикалық іс-шараға Қазақстан ТЖМ аумақтық бөлімшелерінің жедел-құтқару құрамалары, апаттыққұтқару қызметтерінің құрамына кіретін 52/859 әскери бөлімі қатысқан. Оқу-жаттығу шарасы кезінде «Баршаның назарына!» бірыңғай командасы бойынша арнайы дабыл қосу арқылы хабарландыру жүйесінің техникалық дайындығы тексерілді. Сондай-ақ далалық басқару пунктінің жұмысы көрсетілді. Онда қажетті байланыс түрлерімен жабдықталған штабтық шатыр, медициналық қамтамасыз ету, тамақтану, жылыту және психологиялық көмек пункттері ашылды.
Қарағанды облыстық ТЖД басшысы Мұрат Қатпанов қысқа қамдану деңгейіне тоқталды: — Облысымызда қар кептелісі болатын 590 учаске ерекше бақылауға алынған. Бұл учаскелердің жалпы ұзындығы 705 км. Ол жерлер біздің, ішкі істер органының, жолда қызмет көрсетер ұйымдардың назарында. Облысымыз бойынша қысқы мерзімге жауапты мекеме, ұйымдар тарапынан шамамен 3 мыңға тарта адамды және 1300 бірлік техниканы жұмылдыру көзделіп отыр. Биылғы жылы облыстық ТЖД техникалық базасын айтарлық толықтырды.
Оқу-жаттығу барысында азаматтық қорғаныс саласына қарасты құтқару техникалары таныстырылды. Қозғалысы қауқарлы автомашиналар базасындағы жылжымалы байланыс тораптарының мүмкіндіктерін көрсетті. Бұл ретте жаңа автоцистерна біздің елдегі алғашқы пәрменді техника. Әрбір машина су ерітінділерін көбіктендіргішпен беру мүмкіндігі бар сапалы өрт сөндіру аспалы қондырғысының үш бірлігімен жабдықталған. Биік ғимараттардағы алауды ауыздықтау үшін автоцистерна аса тиімді болмақ. «Қыс -2021» командалық- штабтық оқу -жаттығу шарасы барысындағы құтқару әрекеттері, арнайы техникалар облыс басшысы тарапынан да бағаланды.
ӨЗ ТІЛШІМІЗДЕН.