«NAURYZ – FASHION»

Қарағандыда Ұлттық киім күніне арналған ерекше «NAURYZ – FASHION» этно-заманауи киімдер фестивалі өтті. Бұл сән шарасы қала тұрғындарына ұлттық киімдер мен заманауи стильдердің тамаша үйлесімін таныстыруға мүмкіндік берді. Шара Қарағанды облысының мәдениет, архивтер және құжаттама басқармасының бастамасымен, Кеншілер мәдениет сарайының ұйымдастыруымен «Наурызнама» тұжырымдамасы аясында өтті. Фестивальде қазақтың дәстүрлі ою-өрнектері мен ұлттық нақыштағы киімдер заманауи дизайнмен үйлесіп, келушілерді таңқалдырды. Жаңа маусымның сән тенденцияларымен қатар, ұлттық мәдениетіміздің бай мұрасы да лайықты түрде көрсетілді. Бұл шара қазақтың қолөнерін, ұлттық сәнін және мәдениетін жаңаша тұрғыда танытуға зор үлес қосты. «NAURYZ – FASHION» фестивалі – Наурыз мерекесінің рухын көтеріп, көрермендерге ұлттық өнер мен мәдениетімізді тереңірек түсінуге мүмкіндік берген бірегей оқиға болды.

Шараға Қарағанды облысы мен Астана, Алматы қалаларынан 9 танымал дизайнер мен тігінші қатысып, өз шығармашылық туындыларын көрсетті. Көрермендердің назарына 90-ға жуық киім үлгісі ұсынылып, әрбір туынды ұлттық киімдердің шеберлікпен жасалған жаңа көзқараспен таныстырылды. Қазақтың ұлттық киімдері – бұл ғасырлар бойы қалыптасқан, терең тарихы бар мәдени мұраның айқын көрінісі. Әрбір киімнің өзіне тән ою-өрнектері мен дизайны қазақ халқының рухани байлығын, этникалық ерекшеліктерін паш етеді. Ұйымдастырушылардың айтуынша, аталмыш фестивальдің басты мақсаты – қазақ халқының бай мәдени мұрасын заманауи көзқараспен ұсыну, ұлттық киімдерді кеңінен таныту және жас ұрпаққа ұлттық құндылықтарды дәріптеу. Бұл шара арқылы ұлттық сән мен өнердің құндылықтары жаңаша түсінікпен бағаланып, қоғамдағы мәдени сананы жаңғыртуға өз үлесін қосты. «NAURYZ – FASHION» фестивалі қазақтың мәдениетін заманауи өмірмен үйлестіріп, оны әлемге танытуға бағытталған маңызды қадам болды.

– Біздің ұлттық киіміміз – бұл әлемдегі ең әдемі киімдер қатарында. Мен бұл пікірді толық сеніммен айта аламын. Қазақтың ұлттық киімдері тек сәнділігімен ғана емес, оның тарихы, мәдениеті мен терең мағынасына толы болуымен де ерекше. Біз өз ұлттық киімдеріміз бен ұлттық аспаптарымызды әлемнің түрлі елінде жиі көреміз, олардың нәзік әрі айшықты элементтері халықаралық аренада көп назар аудартады. Ал осындай бай мұрамызды біз неге өз елімізде, өз мәдениетімізде дамытуға, оны бүгінгі заман талабына сай етіп жаңғыртуға күш салмаймыз? Біздің міндетіміз – ұлттық киімдерімізді заманға сай етіп, оны кеңінен насихаттау, осылайша өз халқымыздың өнерін әлемге таныту. Әлем таңқалып жатқанда, біз неге өзіміздің бай мәдениетімізді одан әрі дамытып, бүгінгі күнге лайықтап көрсетуге жол бермейміз? Бұл біздің ұлттық мақтанышымыз, және оны жоғалтпай, жаңаша түрде өркендету – біздің басты міндетіміз, – деді Кеншілер мәдениет сарайының директоры Саят Әбдіғали.

Заманауи фестиваль арқылы дизайнерлер дәстүрлі ою-өрнек пен стильді қазіргі заман трендтерімен үйлестірген. Ұлттық киімнің күнделікті өмірге енуіне ықпал етуді көздеген. Фестиваль барысында сән әлеміндегі жаңа бағыттар көрсетіліп, ұлттық киімдердің заманауи үлгілерін көпшілікке ұсыну маңызды орын алды.

– Мен этно стильдегі шапандар, өзіміздің мұрадан келе жатқан шапандарымыздың коллекциясын алып шықтым. Оған 1 айдан аса қызу дайындалдым. Дегенмен былтырғы коллекцияларымнан да 1-2 образ алып шықтым. Себебі ол коллекцияларымды режиссерлер ұсынды. Осындай шаралар біздің елімізге керек деп ойлаймын. Қазақи нақыштағы, бұрынғы ұлттық киімдерді дәріптеп, осындай шара жасап жатқандарға мың алғыс, – дейді сәнгер Салия Бейсенова.

Фестиваль дарынды дизайнерлердің туындыларын халыққа танытып, этно-заманауи киім үлгілерін насихаттау, ұлттық қолөнерді дамыту және мәдени мұраны дәріптеуге бағытталды. Сонымен қатар, дизайнерлер мен қолөнер шеберлері өзара тәжірибе алмасты.

– Осы шарада мен отандық суретшілердің картиналарымен безендірілген топтамамды ұсындым. Біздің брендтің барлық өнімі отандық дарын иелерінің туындыларымен сәнделген. Бұл – керемет картиналар және біз жерлестеріміздің суретшілерімізді білуі керек деп санаймын. Осындай өнер мен сәннің коллаборациясы халық арасында кеңінен таралып, суретшілеріміздің танымалдығы артады деп сенемін, –деп атап өтті сәнгер Людмила Құнанбаева.

Мұндай шаралар ұлттық сән индустриясының дамуына серпін беріп, дәстүрлі қолөнердің жаңғыруына жол ашады деп күтілуде.

Қанағат ЭДУАРДҚЫЗЫ,

«QH»