«Менің сүйікті әкем» суреттер байқауы

Әкенің бала өміріндегі орны ерекше. Қаламызда Әкелер күніне орай ұйымдастырылған «Менің сүйікті әкем» атты балалар сурет байқауы осының айқын дәлелі болды. Шара «Қарағанды вернисажы» жобасы аясында өтіп, Орталық саябақтың басты алаңында қала тұрғындары мен кішкентай суретшілердің мерекесіне айналды.

Байқауды Қарағанды қаласының әкімдігі, қалалық мәдениет бөлімі және облыстық кәсіпкерлер қауымдастығы бірлесіп өткізді. Мақсаты — жас ұрпақты әкеге деген құрметке, отбасылық құндылықты бағалауға баулу, сондай-ақ балалардың өнерге деген қызығушылығын арттыру.

-Қарағанды қаласында әкелер күніне арналған осындай шаралар отбасылық құндылықтарды насихаттауға үлкен үлес қосады. Әкенің орны бөлек екенін балалардың өз суреттері арқылы жеткізгенін көріп, қуанып тұрмыз. Қатысқан барша балақайларға және олардың ата-аналарына алғыс білдіреміз, -деді «Қарағанды облысының кәсіпкерлер қауымдастығы» ҚБ атқарушы директоры Серік Санаубаев.

Байқауға 5 пен 14 жас аралығындағы 60 бала үш жас санаты бойынша қатысты: 5–7 жас, 8–11 жас және 12–14 жас. Әр балаға сурет салуға 30 минут уақыт берілді. Балалар асфальтқа әкелерін батыр, қамқор жан, дос ретінде бейнелеп, жүрек түкпіріндегі алғысын жеткізді. Көрермендер әр суреттен отбасылық жылулық пен балалық сағынышты сезінді.

Бибігүл Құдабаева, Қарағанды облыстық бейнелеу өнері музейінің басшысы, қазылар алқасының мүшесі балалар туындыларында жүректен шыққан шынайы эмоция барын атап өтті.

-Балалардың бәрі өзінше ерекше. Әр суретте жүректен шыққан шынайы эмоция бар. Иә, бізде бағалау кезінде қаралатын бірнеше критерий бар — тақырыпты ашуы, көркемдік шеберлік, әсерлілігі. Бірақ балалардың салған жұмыстарына қарап, бәрі де шынайы көңілмен салынғанын байқаймыз. Сондықтан жеңімпазды анықтау оңай болмайды. Дегенмен, әділдікпен бағалауға тырыстық,- деді ол.

Байқау соңында үздік суретшілерге дипломдар мен сыйлықтар табысталды. Қалған барлық қатысушылар да естелік сыйлықтармен және алғыс хаттармен марапатталды. Ұйымдастырушылар алдағы уақытта да бұл шараны дәстүрлі түрде өткізуді жоспарлап отыр.

«Менің сүйікті әкем» байқауы — балалар үшін ұмытылмас қуанышқа толы күн ғана емес, сонымен қатар ата-анамен байланысты бекемдей түскен әсерлі мереке болды. Отбасылық құндылықтарды дәріптейтін осындай игі істер балалар жүрегіне жылулық ұялатып, болашақта ізгі ұрпақ тәрбиесіне жол ашады.

Құралай КӨБЕНОВА,

«QH»