Мемлекеттік қолдаудың жаңа мүмкіндігі: кәсіп бастаушыларға қайтарымсыз гранттар беріледі

Кәсіпкерлік бастамаларды қолдау мақсатында Business.enbek.kz порталында 11 тамыздан бастап жаңа бизнес-идеяларды жүзеге асыруға арналған қайтарымсыз гранттарға өтінімдер қабылдау басталды. Бұл мемлекеттік қолдау шарасы елімізде шағын және микробизнесті дамытуға бағытталған.

Бағдарлама аясында кәсіп ашқысы келетіндерге және өзінің ісін жаңа бастағандарға 400 айлық есептік көрсеткіш көлемінде (1 572 800 теңге) 4873 грант беру жоспарланған. Қаражат өтеусіз түрде ұсынылады.

Өтінім берушілерге қойылатын талаптар:

— «Бастау Бизнес» бағдарламасы бойынша оқуды аяқтаған жұмыссыз азаматтар;

— жеке кәсіпкер ретінде тіркелгеніне 3 жыл толмаған тұлғалар;

— әлеуметтік осал топ категориясына жататындар.

Қатысу үшін қажетті қадамдар:

— Business.enbek.kz порталында тіркелу;

— валидациядан өту;

— бизнес-жоспарды жүктеу;

— өтінімге ЭЦҚ арқылы қол қою.

Грант қаражатын жабдық, материалдар, мал, көшет сатып алуға, сондай-ақ ғимарат жалдауға жұмсауға болады. Ал жеке қажеттіліктерге, жылжымайтын мүлік алуға және бұрынғы несиелерді өтеуге бұл қаражатты пайдалануға рұқсат етілмейді.

Грант беру туралы соңғы шешімді аудандық комиссия өтініш берушінің бизнес-идеясын қорғағаннан кейін қабылдайды.

Бұл бастама мемлекет тарапынан кәсіпкерлерге жасалып отырған нақты қолдау болып табылады. Егер сіздің бизнес-жобаңыз дайын болса – мүмкіндікті жіберіп алмай, өтінім беруге асығыңыз!

Құралай ЖҰМАҒАЛИҚЫЗЫ,

«QH»