Мектеп асханаларына жаңа талап
Жаңа оқу жылынан бастап мектеп асханалары мен буфеттерінен хот-дог, пицца, шұжық қосылған өнімдер, түрлі нан-тоқаш пен зиянды сусындар толығымен алынып тасталады. Бұл туралы Оқу-ағарту министрі Ғани Бейсембаев Үкіметтегі брифингте мәлімдеді.
Министр балалардың мектептегі тамаққа қатысты жиі шағымданатынын айтты.
«Әрбір бесінші оқушы тамақтың дәмсіз, суық күйде берілетінін және порцияның тым аз екенін айтады. Өткен оқу жылында Маңғыстау облысында 400 бала тамақтан уланған еді. Енді мектептегі тамақ пен санитарлық жағдайға бақылау Денсаулық сақтау министрлігіне берілді. Бұл – өнім сапасын күшейтуіміздің басты себептерінің бірі», – деді Ғани Бейсембаев.
Сапа және қатаң бақылау
Жаңа оқу жылынан бастап мектеп медбикелері тамақ сапасын күнделікті бақылайды. Бұған дейін олардың мұндай міндеті болмаған. «Бұрын комиссия айына бір рет тексерсе, енді күнделікті мониторинг енгіздік», – деп түсіндірді министр.
Санитарлық-эпидемиологиялық қызмет (СЭҚ) енді кез келген уақытта, алдын ала ескертусіз тексеріс жүргізе алады. Бұрын жоспардан тыс тексерулерге тыйым салынған еді, бірақ бұл мәселе заңдық деңгейде шешілді.
Сонымен қатар, мектептердегі тамақтанудың жаңа стандарттары бекітіліп, тұз, қант және басқа да зиянды ингредиенттерді азайтуға бағытталған шаралар қабылданды. Мектеп медбикелері күнделікті тексеріс жүргізіп, балалардың дұрыс тамақтануын қамтамасыз етеді.
Қаржы мәселесі де қарастырылды
Министрдің айтуынша, мектептегі тамақтануға бөлінетін қаржы көлемін жергілікті атқарушы органдар белгілейді. Орта есеппен бұл сома жыл сайын 15-20%-ға өседі, биыл да қаржы көбейеді.
Ғани Бейсембаев жаңа ережелердің негізгі мақсаты – балалардың денсаулығын қорғап, мектеп асханасындағы тамақ сапасын жаңа деңгейге көтеру екенін атап өтті. «Балалардың денсаулығына зиян келтіретін өнімдерге жол берілмейді. Бұл биылғы жылдың басты жаңалығы», – деді министр.
Құралай ЖҰМАҒАЛИҚЫЗЫ,
«QH»