Мұз үстіндегі мейрам: «Сарыарқа» мен жанкүйерлер жүздесті

Қарағандыдағы «Қарағанды-Арена» мұз сарайында шынайы жанкүйерлерге арналған әсерлі шара өтті. «Сарыарқа» хоккей клубының туған күніне орай ұйымдастырылған мерекелік жүздесу жанкүйерлерге көтеріңкі көңіл-күй мен ұмытылмас сәттер сыйлады. Командамен емен-жарқын әңгіме, қолтаңба сессиясы, естелік сыйлықтар мен достық атмосфера – хоккей кешінің басты ерекшелігіне айналды.

Кешкісін мұз аренасы жанкүйерлердің ыстық ықыласына толды. Қонақтар үшін арнайы сайыстар, тосынсыйлар мен сүйікті хоккейшілермен еркін сұқбаттасу мүмкіндігі ұйымдастырылды. Отбасылық жылы атмосферада өткен шарада әр жанкүйер өзін командамен бір тұтас сезініп, ерекше эмоцияға бөленді. Мұз аренасында өткен мерекелік кеш нағыз хоккей жанкүйерлерінің басын қосты. Ойыншылар жанкүйерлермен еркін тілдесіп, қолтаңба беріп, естелік суретке түсті. Көптеген көрермен отбасымен келген, ал кішкентай қонақтарға арнайы сыйлықтар ұсынылды. Бұл кеш әр жастағы жанкүйерлерді бір ортаға топтастырып, спорттың айналасында ерекше ықылас пен жылы көңіл-күй қалыптастырды.

– Бүгін – біздің клуб үшін ерекше күн. Клубтың құрылғанына 19 жыл толып отыр. Бұл айтулы күн жыл сайын жанкүйерлермен бірге атап өтіледі. Біз үшін олардың әрдайым қолдау білдіріп, командаға деген сенімдерін жоғалтпауы – үлкен қуаныш әрі жауапкершілік. Жанкүйерлеріміздің ықыласы бізге шабыт береді, – деді «Сарыарқа» ХК спорттық директоры Виталий Смольянинов.

Мерекелік кеш барысында клубтың жаңа маусымға арналған бапкерлік құрамы да таныстырылды. Негізгі мамандар өз орындарын сақтап қалды: бас бапкер қызметін Владимир Князев жалғастырады, ал оның көмекшісі ретінде Виктор Буяльский жұмысын жалғастырмақ. Командалық штабқа жаңа маман – бейне аналитик Евгений Ермаков қосылып, жаттықтырушылар құрамын толықтырды.

Қанағат КҮЛШЕБАЕВА,

«QH»