Ұлттық ойынымыз Чехия төрінде

Қарағанды облысының спортшылары ұлттық ойынымыз тоғызқұмалақтан Чехияда өткен халықаралық додада ел абыройын асқақтатып, жүлделі орындарды қанжығасына байлады. Әлемнің түкпір-түкпірінен жиналған мықтылармен сынға түскен Ернұр Қарығұл мен Әділхан Төлегенов күміс және қола медаль жеңіп алды.

Халықаралық деңгейдегі бұл жарыс Чехияның Пардубице қаласында өтті. Турнир аясында тоғызқұмалақтан Әлем кубогы мен әлем чемпионаты ұйымдастырылды. Аталған бәсекеге Қазақстаннан бөлек, Чехия, Румыния, Түркия, Қырғызстан, Венгрия, Польша, Австрия, Словакия, Молдова, Болгария, Сербия, Оңтүстік Корея, АҚШ және Украина елдерінен келген спортшылар қатысты.

Блиц-турнир санатында бақ сынаған қарағандылық Ернұр Қарығұл ересектер арасында жоғары нәтижеге қол жеткізіп, күміс жүлдені еншіледі. Ал Бұқар жырау ауданының өкілі, 21 жасқа дейінгі жастар санатында өнер көрсеткен Әділхан Төлегенов қола медальға қол жеткізді.

– Қарсыластар расымен де өте тәжірибелі әрі мықты болды. Барлығы жеті тур өткіздік. Соның бесеуінде жеңіске жеттім. Әуелде қобалжу болғаны рас, халықаралық аренада, облыс атынан өнер көрсету үлкен жауапкершілік жүктейді. Алайда өзімді тез қолға алып, барынша жақсы нәтиже көрсетуге тырыстым, – дейді жас спортшы Әділхан Төлегенов.

Қарағандылықтардың жетістігі өңірде ұлттық спорт түрлерінің дамып келе жатқанын көрсететін айқын дәлел. Жергілікті жаттықтырушылар мен мектептерде тоғызқұмалаққа қызығушылық танытатын жастардың саны жылдан жылға артып келеді. Бұл жолғы халықаралық жарыстағы нәтижелер соның жемісі.

Айта кетейік, дәл қазіргі уақытта Моңғолияда тірек-қимыл жүйесі мен көру қабілеті бұзылған спортшылар арасында тоғызқұмалақтан әлем чемпионаты басталды. Қазақстан құрамасы сапында Қарағанды облысы, Қарқаралы қаласынан жаттықтырушы Бүркіт Бейсенаев пен оның шәкірті Дастан Үмітқалиев өнер көрсетуде. Бұл додада да жерлестеріміз жеңіс тұғырынан көрінеді деген үміт бар.

Ералы ҒАНИ,

«QH»