Ұлттық киім – халық қазынасы
Қарағандыда «Наурызнама» мерекесі аясында ерекше сән көрсетілімі өтті. Сауда ойын-сауық орталықтарының бірінде қазақ ұлттық киімдерінің этноколлекциясы көпшілікке ұсынылды. Әсем киімдер мен дәстүрлі нақыштар үйлесімін тапқан шараның басты мақсаты – ұлттық мәдениетімізді жаңғыртып, жастар арасында өзіміздің бай мұрамызға деген құрметті арттыру. Шара Қарағанды әкімдігінің қолдауымен және ORTA студиясының бірлесуімен ұйымдастырылып, қала тұрғындары мен қонақтарына ұмытылмас әсер қалдырды. Ұлттық нақыштағы сән үлгілері, қолөнер туындылары мен заманауи дизайнның үйлесімі, келушілерді таң қалдырып, Наурыз мерекесінің көңілді атмосферасын одан әрі қыздырды. Мұндай шаралар қазақ мәдениетінің айшықты элементтерін жаңаша қырынан көрсетуге, ұлттық өнерімізді әлемдік деңгейде танытуға мүмкіндік береді.
Қазақтың ою-өрнектері, көз тартар зергерлік бұйымдары, ұлттық нақыштағы киім үлгілері – бәрі де ORTA студиясының ерекше этноколлекциясында ұштасып, таңғажайып сән көрмесін құрады. Әрбір туынды ұлттық мұрамызды жаңғыртып, қазақ қолөнерінің ғасырлар бойғы бай дәстүрін заманауи сән әлеміне бейімдей отырып, ерекше әсемдікпен үйлескен. Бұл коллекцияның авторы – талантты дизайнер Динара Жунусова, ол қазақтың бай мәдениетін, тарихын және өнерін өз шығармашылығында терең түсіністікпен көрсете білді. Динараның қолынан шыққан киімдер мен зергерлік бұйымдар тек эстетикалық құндылықтарымен ғана емес, қазақтың ұлттық рухын, оның мән-маңызын, байлығын да білдіреді. Осы коллекция арқылы дизайнер ұлттық сәнді заманауи дүниемен үйлестіріп, қазақ халқының мәдениетіне деген сүйіспеншілігін паш етті.
– Бұл толықтай ұлттық контентке маманданған Қазақстандағы алғашқы студия. Оның ішінде толықтай шынайы локация және қазақы нақышта безендірілген. Сондай-ақ студиямыз көне мұражай экспонаттарын ұсынады. Ал, бүгін сауда үйінде тамаша этникалық авторлық коллекцияларды ел назарына ұсындық, – деді этнодизайнер, «Orta Ethnostudio» негізін қалаушы Динара Жүнісова.
Көрсетілімді тамашалауға мәдениет қайраткерлері, сән саласының мамандары мен қала тұрғындары жиналды.
– Ұлттық киімге бас бұрдым, неге десеңіздер өте қызық екен. Бұрыңғы өзіміздің ескіден келе жатқан киімдеріміз, оның өзі әрбір мағынасы бөлек болады екен. Бөріктің, тақияның, шапанның, шапанға жабыстырған өрнектерде әртүрлі мағына береді екен. Сондықтан маған өте қызықты болды, – дейді дизайнер, тері шебері Маруа Закирова.
Сән көрсетілімінде «Qazyna» би және сән театры қойылым ұсынды. Киім үлгілері дәстүрлі би мен сахналық қойылым арқылы таныстырылды. Шара Қали Байжанов атындағы концерттік бірлестіктің «Арқа сазы» ансамблінің сүйемелдеуімен өтті.
– Өзіміздің осы Қарағанды қыздарының, әжелеріміздің, келіншектеріміздің күнделікті өз киімдерін киіп жүргендері өте қуанышты. Біз өзіміздің ұлттық киіміміз – ол біздің байлығымыз, ол біздің елге көрсетер брендіміз. Сондықтан оны ұмытпауымыз керек, әрқашан да дәріптеуіміз қажет, – деп атап өтті Қарағанды қалалық мәдениет, тілдерді дамыту және спорт бөлімінің басшысы Баян Нұртаева.
Бұл ORTA студиясы ұсынған алғашқы ұлттық киімдер көрсетілімі. Ұйымдастырушылар аталмыш шараны дәстүрге айналдыруды көздеп отыр.
Қанағат ЖИЕНҚҰЛОВА,
«QH»