Әлеуметтік тұрақтылық – өңір дамуының негізі
Қарағанды облысында әлеуметтік қорғау саласында жүйелі жұмыстар жүргізіліп келеді. Бұл туралы өңірлік коммуникациялар қызметінде өткен брифинг барысында Жұмыспен қамтуды үйлестіру және әлеуметтік бағдарламалар басқармасының басшысы Төлеу Мұхтар мәлім етті.
– Аймақтың әлеуметтік-экономикалық дамуы аясында халықтың әл-ауқатын арттыру мен әлеуметтік әлсіз топтарды қолдау басты басымдық ретінде қарастырылады. 2025 жылға арналған жоспарлы шаралардың барлығы толық орындалды, – деді басқарма басшысы.
2025 жылдың алғашқы тоқсанында Қарағанды облысындағы жұмыссыздық деңгейі 4,0 пайызды құрады. Бұл өткен жылдың осы кезеңімен салыстырғанда 0,2 пайызға төмен және республикалық көрсеткіштен әлдеқайда төмен деңгейде екені атап өтілді.
Жұмыспен қамтуды қамтамасыз ету мақсатында «Жұмыспен қамту өңірлік картасы» бекітіліп, оның аясында шамамен 48 мың адамды жұмысқа орналастыру көзделген.
– Биылғы жылдың алты айында жұмыспен қамту шараларымен 22,6 мың адам қамтылды. Оның ішінде 18 мыңнан астамы нақты жұмысқа орналасса, 3 мың адам жаңадан құрылған жұмыс орындарына жіберілді. Жастарды жұмыспен қамту басты назарда. Жұмысқа орналасқандардың 7 мыңнан астамы – жастар. Сонымен қатар, 857 мүмкіндігі шектеулі азамат жұмысқа орналастырылды. Соңғы үш жылда олардың жұмыс істеуіне жағдай жасау мақсатында 39 арнайы жұмыс орны құрылды, – деді Төлеу Мұхтар.
Жыл басында зейнет жасындағы азаматтарға арналған «Алтын жас» жобасы іске қосылған. Бұл бағдарлама аясында бүгінде 530 адам жұмысқа орналасқан. Бағдарлама бойынша еңбекақының 50%-ына дейін, бірақ 85 мың теңгеден аспайтын сома субсидияланады.
2025 жыл – «Жұмысшы мамандықтар жылы» деп жарияланған болатын. Осыған байланысты жастарды қысқа мерзімді курстар арқылы кәсіптік оқыту қолға алынған. Қазіргі таңда 487 адам кәсіптік оқуға жіберілсе, олардың 62-сі жұмыс орнында тәжірибе жинауда. Сонымен қатар, Skills Enbek платформасы арқылы 2 565 адам онлайн оқудан өткен.
Әлеуметтік осал топтарды қолдау мақсатында жүзеге асырылған «Jumys Tap» жобасы аясында 150 азамат оқуды сәтті аяқтап, сертификат алды. 70 бос жұмыс орындары жәрмеңкесі ұйымдастырылып, оған 5 445 адам қатысқан. Нәтижесінде 261 адам тұрақты жұмысқа орналасқан.
Кәсіпкерлікті дамыту бағытында да нақты шаралар қолға алынған. «Бастау Бизнес» жобасы аясында бүгінде 91 грант берілген. Бұл – жылдық жоспардың 48,4 пайызы. Тамыз айында өтетін екінші кезеңде тағы 134 грант беру көзделіп отыр.
2025 жылдың 1 шілдесіндегі жағдай бойынша атаулы әлеуметтік көмек 3 482 адамға тағайындалды. Бұл өткен жылмен салыстырғанда 1 769 адамға аз. Мұны мамандар өңір халқының әлеуметтік-экономикалық жағдайының жақсаруы және белсенді жұмыспен қамту шараларына қатысуының артуымен байланыстырады.
Облыста қазір 7 Отбасын қолдау орталығы жұмыс істейді. Олар тұрғындарға заңдық, психологиялық, әлеуметтік кеңес береді. Мемлекеттік органдармен бірлескен мобильді топтар қиын жағдайда жүрген азаматтарды анықтап, көмек көрсетуде. Сәуір айында олардың құрамы жаңартылып, құрамға 170 жергілікті атқарушы орган өкілі, 749 білім беру, 252 денсаулық сақтау, 208 ішкі істер саласы маманы енгізілген. Брифинг барысында айтылғандай, отбасылардан келіп түскен 197 дабылдың 180-і өмірлік қиын жағдайға, ал 18-і тұрмыстық зорлық-зомбылыққа қатысты болған.
Бүгінде облыста 55 мыңнан астам мүгедектігі бар адам тұрады. Олар үшін 493 млн теңге бөлініп, оңалту құралдарына арнайы портал арқылы 22 мыңнан астам тапсырыс берілген. «Инватакси» қызметі 12 өңірде жұмыс істеп, 2 218 адамға тегін қызмет көрсеткен. «Ten Qogam» орталықтары мүгедектігі бар азаматтарға құқықтық, психологиялық және әлеуметтік кеңес береді.
Ұлы Отан соғысына қатысқан 7 ардагерге Жеңістің 80 жылдығына орай 5 миллион теңгеден біржолғы материалдық көмек көрсетілген. Сондай-ақ, өзге ардагерлер санатына жататын азаматтар да назардан тыс қалмаған. Оларға санаторлық-курорттық ем алу мүмкіндігі ұсынылуда.
Қарағанды облысында әлеуметтік қызмет көрсету бағытында 10 стационарлық орталық, 2 оңалту орталығы және бірнеше күндізгі бөлімше жұмыс істейді. Жыл соңына дейін аутизм спектрі бұзылған балаларға арналған 125 орындық орталық ашу жоспарланған.
– Мемлекеттік қызмет көрсету шеңберінде 128 адам қандас мәртебесін алса, шетелдік жұмыс күшін тартуға 176 рұқсат берілді. Украинадан келген 4 азаматқа босқын мәртебесі берілді. Халықты жұмыспен қамту – әлеуметтік тұрақтылықтың негізі. Біз бұл бағытта жоспарланған көрсеткіштердің барлығын орындаймыз, – деді басқарма басшысы Төлеу Мұхтар.
Жалпы, облыста әлеуметтік қорғау және жұмыспен қамту саласындағы кешенді саясат халықтың әл-ауқатын арттыруға, қоғамдағы тұрақтылықты сақтауға бағытталған. Бұл жұмыстар алдағы уақытта да қарқынды жалғасын таппақ.
Ералы ҒАНИ,
«QH»