Хакерлік марафон
Енді кадрларды жалдауға қарағандылық айти мамандары әзірлеген боттар көмектеседі. Кеншілер астанасында облыс бағдарламашыларына арналған хакерлік марафон өтті. Облыстың әр түкпірінен жиналған командалар үш күн бойы үздік атану үшін жарысты.
Қарағандыда ең ауқымды хакерлік марафондардың бірі өтті. Хакатон – бұл шектеулі уақыт ішінде жаңа IT шешімін жасау үшін мамандар жиналатын қарқынды идеялар марафоны. Егер әдетте айти мамандарының командасы идеяны әзірлеуге бірнеше апта жұмсайтын болса, Хакатон қатысушыларына ең көп дегенде екі күн беріледі. Бұл шараның тақырыбы үміткерлерді іздеу және іріктеу үшін заманауи HR жүйесін әзірлеу болды. Хакатонға Қарағанды үшін рекордтық 80 команда қатысты – 230-дан астам үміткер, оның ішінде әзірлеушілер, талдаушылар мен дизайнерлер бар. Үш күн ішінде олар компанияларды жалдауды жеңілдететін және жеделдететін жүйені ойлап тауып, құруы керек еді.
– Бүгін біз серіктестерімізбен бірге HR жүйелері бойынша хакатон ұйымдастырдық. Бұл жерде барлық қатысушы осы салаға байланысты түрлі шешімді ұсынулары тиіс. Жалпы 80 команда, 230 қатысушы хокатонға тіркелді. Қазіргі таңда бұл «Террикон алқабы» ұйымдастырған шаралардың ішінде қатысушылар саны жағынан рекордтық көрсеткіш болып отыр. Хакатонның өзі үш күнге созылды. Шара соңында барлық команда мен қатысушылар жасаған жобаларын көрсетіп, арасынан үздік деп танылған жұмыстар іріктеліп, жеңімпаздар анықталды, – дейді ұйымдастырушы Диана Салехова.
Жүлде қоры 1 миллион теңгені құрады. Жүлделі орындарға ие болған командалар жомарт марапаттарға ие болды: жеңімпаздар 500 000 теңге, екінші орынға 300 000 теңге, ал қола жүлдегерлер 200 000 теңге алды. Жұмыс деңгейі соншалықты жоғары болғандықтан ұйымдастырушылар қосымша жүлделерді бөлу туралы шешім қабылдады. Көрермендер көзайымы жүлдесі үшін 100 мың теңгеден 2 қосымша марапат тағайындалды.
– Шараға қатысушыларға өнімді әзірлеуге 56 сағат беріледі. Сайысқа қатысушылар – үздіктердің үздігі. Кейстің тақырыбы – бос лауазымға үміткерлерді іріктеу және таңдау, – дейді тағы бір ұйымдастырушы Рахымбек Әубәкір.
Хакатон – бұл тек байқау ғана емес, сонымен қатар қатысушылар үшін пайдалы таныстық пен көңіл-көтеру, дағдыларды қалыптастыру және мәлімдеме жасау мүмкіндігі. Егер сәтті болса, мұндай шараларда әзірленген бағдарламалар бүкіл елде қолданылады.
Жұпар ТОНТАЙТЕГІ,
«QH»