Федоров су қоймасындағы балық қырылуы: апат себеп пе, әлде кездейсоқтық па?
Қарағандыдағы Федоров су қоймасынан өлі балықтар табылды. Қоғам белсенділері мұны 10-коллектордағы апаттан төгілген кәріз суларымен байланыстырса, коммуналдық қызмет өкілдері керісінше, көлге лас су түспегенін алға тартады. Жағдайдың себебі зертханалық сараптамадан кейін ғана белгілі болады.
23 тамыз күні қаладағы басты кәріз жүйесінің бірі – тәулігіне 90 мың текше метр ағынды су өткізетін 10-коллекторда ірі апат тіркелген. Кәріз сулары жер бетіне жайылып, Кіші Бұқпа өзеніне құйылған. Ал бұл өзен бау-бақша аумағының ортасынан ағып өтеді де, ақыры Федоров су қоймасына барып қосылады.
– «Қарағанды Су» осы өзенге ағынды су жіберуге мәжбүр. Құбырдың кей жерінде лас су бетке шығып, тұтас алқапты басып қалады. 133-құдықтан шыққан кәріз суы екі күн бойы тоқтаусыз ақты, – дейді қоғам белсендісі Жұмабай Ысқақов.
Ал «Қарағанды Су» өкілдері Федоров су қоймасына ағынды су түспегенін айтады.
– Барлық лас су Бұқпа өзеніне кетеді. Ол Федоров су қоймасына қосылмайды. Бір тәулік бойы апатты жоюға техника толық жұмылдырылды, уақытша айналма арна салынды, – деп сендірді мекеменің бас директоры Ербол Төлеуов.
Мекеме мамандары су қоймасынан бар-жоғы 12 өлі балық табылғанын мәлімдеді. Алайда қоғам белсендісі мен жергілікті тұрғындар мұнда жаппай қырылу байқалғанын алға тартып отыр. Әлеуметтік желіде де бұл туралы пікірлер көбейіп кетті.
Оқиға орнына санитарлық-эпидемиологиялық бақылау, экология департаменті және балық инспекциясының қызметкерлері келді. Мамандар су сынамасын алып, зертханаға жіберді. Алдын ала талдау 20 күннен кейін дайын болады.
– Федоров су қоймасына кәріз суы қосылғанын байқамадық. Дегенмен нақты жауапты тек сараптама береді, – дейді Қазыбек би ауданы санитарлық-эпидемиологиялық бақылау басқармасының бөлім басшысы Наталья Николас.
Сарапшылардың айтуынша, ағынды суларда оттегіні өзіне тартып алатын заттар көп. Бұл судағы оттегі мөлшерін азайтып, балықтың тұншығып өлуіне әкелуі мүмкін.
Қазір 10-коллектордың апатты аумағын жөндеу үшін шамамен 1,5 млрд теңге қажет, ал толық жаңартуға 50 млрд теңге кетеді. Жаңа коллектор салатын бос жер жоқ. Бұл мәселе облыс әкімінің деңгейінде қаралып жатыр.
Федоров су қоймасы – Қарағандының стратегиялық су қоры әрі қаладағы ресми рұқсат етілген жалғыз шомылу орны. Сондықтан мамандар жағдайдың нақты себебін анықтауға асық.
Құралай ӘЛЖАППАР,
«QH»