Ерлікке тағзым, елдікке құрмет

Қала орталығында кеншілерді еске алу ескерткішіне гүл шоқтарын қою рәсімі өтті. Тағылымды шараға еңбек ардагерлері мен жастар қатысты. Олардың қатарында «Шахтер» футбол клубының ойыншылары да болды. Олар тарихқа тағзым етіп, құрмет көрсетті.

Ескерткішке тағзым ету өткенге құрмет, болашаққа аманат. Шараға келген ардагерлер жас ұрпаққа өнегелі тәрбие жайлы ой бөлісіп, тарихтан сыр шертті. Олар бейбіт өмірдің бағасын түсіндіріп, ел бірлігінің маңызын атап өтті. Жиналғандар батырлар рухына тағзым етіп, бір минут үнсіздік жариялады. Шара соңында ардагерлер мен спортшылар естелік суретке түсті.

– Біздің Қарағанды кеншілердің қаласы. Мұнда әр отбасының тарихы жер астындағы еңбектен басталады десек, артық айтқандық емес. Кенші – қашанда халықтың сүйеніші, елдің тірегі болған. Біз осындай дәстүрді жалғастырып, жас буынға еңбектің қадірін түсіндіріп келеміз. Менің ойымша осындай тағылымды шаралар жас ұрпақ үшін үлкен өнеге. Себебі тарихты ұмытпай, оны құрметтеу арқылы біз болашаққа жол көрсетіп жатырмыз, – деді ардагер кенші Ислям Муслимов.

Ардагерлермен қатар, «Шахтер» футбол клубының ойыншылары да гүл шоқтарын қойды. Спортшылар өз кезегінде тарихи мұраға құрметпен қарау әр азаматтың парызы екенін және қала халқының қуанышы үшін әрбір матчта жеңіске жетуге бар күш-жігерін салатындарын айтты. Олар үшін мұндай шара рухани тәрбие беретін ерекше сәт болған. Футбол алаңында ғана емес, қоғам өмірінде де белсенді ойыншылар ел тарихын қастерлеуде үлгі болып отыр.

– Біз бүгін осында келіп гүл шоқтарын қойдық. Бұл өткенге құрмет көрсету ғана емес, жастарға үлгі болатын шара. Өйткені біз тек футболшы емес, елдің бір бөлшегіміз. Кеншілердің еңбегін дәріптеу біздің парызымыз. Олар бүгінгі бейбіт өмірдің негізін қалады. Біз сол ерлікті бағалап, барынша қолдауды қалаймыз. Әрбір ойынға шыққанда біз жанкүйерлерімізді қуантуды мақсат тұтамыз. Сол үшін алаңда бар күшімізді салып ойнаймыз, – деді «Шахтёр» футбол клубының ойыншысы Айдос Тәттібаев.

Қарағанды – кеншілер қаласы. Жер астындағы еңбегімен елді өрге сүйреген кеншілердің рухы осындай ескерткіштерде мәңгі сақталады. Бүгінгі рәсім сол ерлікті еске алудың бір көрінісі. Келушілердің айтуынша, мұндай шаралар дәстүрге айналып келеді. Бұл тарихты дәріптеудің, өскелең ұрпақты отансүйгіштікке тәрбиелеудің маңызды бір жолы.

Ералы ҒАНИ,

«QH»