Дені саудың жаны сау
Қарағанды облысы, Шет ауданының Нұраталды ауылдық округіне қарасты Ақсу және Қызылқой ауылдарының тұрғындары үшін маңызды жаңалық – осы елді мекендерде жаңа заманауи медициналық пункттер ашылды. Бұған дейін бұл ауылдарда медициналық қызмет көрсетуге арналған жеке ғимарат болмаған еді. Енді тұрғындар сапалы медициналық көмекті өз ауылдарынан алыстамай-ақ ала алады.
Жаңа нысандар «Ауылдық денсаулық сақтауды жаңғырту» ұлттық жобасы аясында, Мемлекет басшысының тапсырмасы бойынша бой көтерді. Бұл жобаның мақсаты – шалғай ауылдардағы халықтың медициналық қызметке қолжетімділігін арттыру және денсаулық сақтау инфрақұрылымын дамыту.
Ақсу мен Қызылқой ауылдарында салынған медициналық пункттер бір ауысымда 25 адамға дейін қабылдай алады. Ғимараттар толықтай заманауи жабдықтармен жабдықталған. Мұнда дәрігерге дейінгі қабылдау, тексеру және емшара кабинеттері қарастырылған.
Ақсу ауылында 10 жылдан бері медбике қызметін атқарып келе жатқан Гүлнұр Аханова жаңа пункттің ашылғанына аса қуанышты екенін жеткізді.
– Бұған дейін арнайы ғимарат болмағандықтан, тұрғындарға үй жағалап көмек көрсетуге тура келетін. Ал енді бәрі ыңғайлы әрі қауіпсіз жағдайда жүзеге асады. Жаңа құрал-жабдықтар да жұмысымызды жеңілдетіп отыр, – дейді ол.
Қызылқой ауылында да осыған дейін жеке медициналық мекеме болмаған. Тұрғындар денсаулықтарына байланысты мәселелермен көрші елді мекендерге қатынауға мәжбүр болатын. Енді жаңа медициналық пункттің ашылуымен бұл мәселе шешімін тапты.
Ауыл тұрғыны Сабыр Шоқиев бұл бастаманың маңыздылығын ерекше атап өтті:
– Денсаулық – бәрінен қымбат. Ал халық денсаулығы – дәрігерлер мен медициналық қызметтің сапасына тікелей байланысты. Жаңа пункт тұрғындардың өмір сапасын жақсартады. Мұндай әлеуметтік нысандардың салынуына үлес қосқан барлық азаматтарға алғысым шексіз.
Қазіргі таңда Шет ауданында барлығы 10 медициналық пункт пен 2 фельдшерлік-акушерлік пункттің құрылысы жүргізілуде. Бұл нысандардың басым бөлігі 2025 жылдың соңына дейін пайдалануға беріледі деп күтілуде. Бұл – тек ауыл тұрғындары үшін ғана емес, өңірлік денсаулық сақтау жүйесі үшін де маңызды серпіліс.
Ауылдық аймақтарда сапалы медициналық қызметке қолжетімділікті арттыру – әлеуметтік әділдіктің маңызды көрінісі. Шет ауданындағы Ақсу мен Қызылқой ауылдарының жаңа медициналық пункттері тұрғындардың өмір сүру сапасын жақсартуға бағытталған нақты қадам. Бұл нысандар алдағы уақытта талай адамның денсаулығын сақтап, өмірін жеңілдетуге сеп болады.
Ералы ҒАНИ,
«QH»