Бірлікпен гүлденген Сарыарқа

Қазақстан халқы Ассамблеясының 30 жылдық мерейтойына орай Қарағанды облыстық бейнелеу өнері музейінде «Бірлікпен гүлденген Сарыарқа» атты көрме ашылды. Шараға өңірдегі этномәдени бірлестіктер қатысып, ұлттық құндылықтар мен тарихи жәдігерлер арқылы халықтар достығы дәріптелді.

Музей төрінде Қазақстанды мекендеген түрлі этнос өкілінің тұрмыс-тіршілігінен сыр шертетін құнды дүниелер қойылды. Көрмеде ұлттық киімдер, музыкалық аспаптар, қолөнер туындылары және тұрмыстық бұйымдар жұртшылық назарына ұсынылды. Әрбір жәдігер – ғасырлардан жеткен мәдениеттің айғағы әрі ел бірлігінің жарқын көрінісі.

Көрме Қазақстан халқы Ассамблеясының облыстық хатшылығы мен «Қоғамдық келісім» мемлекеттік мекемесінің қолдауымен ұйымдастырылды. Бұл бастама мерейтой аясында көпұлтты елдің мәдени байлығын паш етуге бағытталды. Шараға келген тұрғындар әр этномәдени орталықтың тарихымен және тыныс-тіршілігімен танысты.

– Қазақстан халқы Ассамблеясының 30 жылдығы баршамызға құтты болсын. Бұл ұйым мәдени және спорттық шаралардың бастамашысы болып келеді. Биылдың өзінде бірқатар жетістікке қол жеткізді. Халықты бірлікке шақыратын ұйымымыз әлі де талай игі істерге ұйытқы боларына сенемін, – деді Қарағанды облысының Ішкі саясат басқармасы «Қоғамдық келісім» КММ директоры Гүлнар Касембекова.

Ұйымдастырушылардың айтуынша, мұндай мәдени шаралар жастардың бойына өзге халықтардың мәдениетін құрметтеуді сіңіріп, Қазақстандағы татулық пен тұрақтылықты нығайта түседі. Ассамблеяның басты мақсаты да – халықтар арасындағы өзара түсіністік пен сыйластықты арттыру.

– Мұнда әр ұлттың мәдениетін айқындайтын туындылар мен ұлттық киімдер қойылған. Келушілер осылар арқылы түрлі мәдениеттермен танысып, ой бөліседі. Бұл үлкен сыйластықтың белгісі деп ойлаймын. Жалпы музей – көзі ашық, мәдениетті адамдардың жиі келетін орны, – деді Қарағанды облыстық бейнелеу өнері музейінің экскурсия жетекшісі Арай Қасым.

Көрме залында тұрмыстық жәдігерлермен қатар бейнелеу өнерінің туындылары да орын алған. Суреттер мен мүсіндер Сарыарқаның табиғатын, достық пен бірлікті бейнелейді. «Бірлікпен гүлденген Сарыарқа» көрмесі – Ассамблеяның мерейтойын атап өтумен қатар, қоғамды ынтымақ пен татулыққа шақыратын маңызды мәдени шаралардың бірі болды.

Ералы ҒАНИ,

«QH»