Білімге жол ашық: Қарағанды облысы жаңа оқу жылына сақадай сай
Араға бір апта салып еліміздегі барлық білім беру ұйымдарында жаңа оқу жылы басталады. Қазіргі таңда облыс мектептері оқушыларды қабылдауға толық дайын.
1 қыркүйектен бастап Қарағанды облысы бойынша 419 мектеп өз жұмысын бастайды. Оның ішінде 392 мемлекеттік жалпы білім беретін мектепте 168 887 оқушы білім алады. Ал 17 жеке мектепте 2 276 оқушы болса, 10 мамандандырылған мектеп-интернатта 1 385 оқушы оқиды.
Жалпы жаңа оқу жылында партаға 175 мыңнан астам бала отырады. Оның ішінде 15 616 бала – бірінші сынып оқушылары. Қазіргі уақытта бірінші сыныпқа 14 563 өтініш қабылданды, өтініш қабылдау 31 тамызға дейін жалғасады.
Биылғы оқу жылынан бастап облыста 4 жаңа мектептің есігі айқара ашылады. Олардың қатарында Талды ауылындағы апатты жағдайдағы мектептің орнына салынған 200 орындық білім ордасы бар. Сондай-ақ «Келешек мектептері» жобасы аясында Қарағанды қаласының Гүлдер шағын ауданында 300 орындық, Томирис шағын ауданында 1200 орындық, Балқаш қаласында 900 орындық жаңа мектеп пайдалануға беріледі.
– Біздің басты мақсатымыз әр балаға сапалы әрі қолжетімді білім беру. Жаңа мектептердің ашылуы, әсіресе халық тығыз қоныстанған аудандарда орын тапшылығын айтарлықтай азайтады. Бұдан бөлек, мектептерді оқулықтармен қамтамасыз ету мәселесі толық шешілді. Биыл 2,5 миллиард теңгеден астам қаржы бөлініп, қажеттіліктің 100%-ы қамтамасыз етілді, – деді Білім басқармасының мектепке дейінгі тәрбие, жалпы орта және арнайы білім беру ұйымының басшысы Гүлдана Нұрсұлтан.
Жаңа оқу жылынан бастап облыстың барлық мектебінде тегін ыстық тамақ ұйымдастырылады. Бұл бастама 67 мыңнан астам бастауыш сынып оқушысына қатысты болады. Оның ішінде әлеуметтік осал отбасылардан шыққан 5 мыңға жуық бала «Жалпыға бірдей білім беру» қоры есебінен қолдау алады.
Сонымен қатар «Әлеуметтік әмиян» жобасы іске асырылуда. Бұл жоба аясында ата-аналар құжат жинамай-ақ, eGov mobile қосымшасы арқылы баласының мектеп асханасындағы тамақтануын бақылап, сапасына баға бере алады.
Оқушыларды мектепке тасымалдау мәселесі де назардан тыс қалған жоқ. Облыстың 99 елді мекенінде мектеп жоқ болғандықтан, 1 191 балаға күнделікті тасымалдау ұйымдастырылады. Бұл мақсатта 80 көлік құралы жұмылдырылған.
Дәстүрлі «Мектепке жол» акциясы аясында әлеуметтік аз қамтылған және көпбалалы отбасылардың балалары мектеп формасы мен кеңсе тауарларымен қамтамасыз етіледі. Облыста мектеп жәрмеңкелері ұйымдастырылып, отандық өндірушілердің өнімдері төмендетілген бағамен сатылуда.
– Биыл облыста 10 мыңға жуық оқушы мектеп формасы мен қажетті құрал-жабдықтармен қамтамасыз етіледі. Бұл жұмыстар «Жалпыға бірдей білім беру қоры» есебінен жүзеге асырылады. Ата-аналарға ескертеріміз – барлық оқулық пен құралдар тегін беріледі, қосымша сатып алудың қажеті жоқ, – деді Гүлдана Нұрсұлтан.
Жаңа оқу жылында облыстағы 52 колледж жұмысын жалғастырады. Мемлекеттік тапсырыс аясында 9 300 орын қарастырылып, оның 60%-ы техникалық мамандықтарға бөлінген. Дуальды оқыту жүйесі арқылы 7 мыңға жуық студент білім алуда.
Қазіргі таңда өңірде 24 487 педагог қызмет етеді. Жыл сайынғы жас мамандардың келуі арқасында кадр тапшылығы біртіндеп шешілуде. Сонымен қатар, «Teach for Qazaqstan» жобасы бойынша педагогикалық емес білімі бар мамандар қайта даярланып, мектептерде жұмыс істеуге мүмкіндік алуда.
Биыл облыстағы 265 білім беру нысанына жөндеу жұмыстары жүргізілуде. Оған 15,3 миллиард теңге бөлінді. Сонымен бірге химия, физика, биология, STEM және робототехника пәндеріне арналған 77 жаңа модификацияланған кабинет сатып алынуда. Нәтижесінде заманауи кабинеттермен қамту көрсеткіші 85%-ға жетпек.
Жаңа оқу жылы 2 қыркүйекте басталып, 25 мамырда аяқталады. Алғашқы қоңырау мен Білім күніне арналған салтанатты жиындардың мерзімін әр мектеп өз педагогикалық кеңесімен белгілейді.
Қорытындылай келе, Қарағанды облысы жаңа оқу жылына толық дайын. Жаңа мектептердің ашылуы, тегін ыстық тамақ, әлеуметтік қолдау, сапалы оқулықтар мен заманауи кабинеттер – мұның барлығы балалардың білім алуына қолайлы жағдай жасайды.
Ералы ҒАНИ,
«QH»