Білімдінің күні жарық
Таиланд астанасы Бангкокта өткен XXI Халықаралық география олимпиадасында (IGeO – 2025) қарағандылық жас талант Талғат Байбосынов алтын медаль иеленіп, Қазақстанның білім саласындағы үлкен жетістігіне үлес қосты.
Биылғы додаға 47 елден 200-ге жуық дарынды оқушы қатысқан. Үш кезеңнен тұратын күрделі жарыста Талғат үздік дайындық пен терең білімін дәлелдеп, ең жоғары көрсеткішке қол жеткізгендердің қатарынан көрінді. Осылайша ол Қазақстан қоржынына алтын медаль салды.
Географияға деген қызығушылығы бала кезден басталған Талғат сегізінші сыныптан бастап олимпиадалық есептерді шешумен айналысып келеді. Халықаралық додаға баратын ұлттық құраманы іріктеу бірнеше кезеңнен тұрған. Нәтижесінде 15 үміткердің арасынан үздік төртікке еніп, ел намысын қорғауға мүмкіндік алған.
– Мен үшін ең есте қалған сәттердің бірі – Қазақстанның мәдениеті туралы шетелдік қатысушыларға айту болды. Біз елдегі мәдениеттердің алуан түрлілігі мен тарихи ерекшеліктердің сәулет өнеріне ықпалы жайлы бөлістік. Өз тәжірибемізді таныстыру мен үшін ерекше мүмкіндік болды. Бұл олимпиада менің көкжиегімді кеңейтіп, өмірімдегі маңызды белестердің біріне айналды, – дейді алтын медаль иегері Талғат Байбосынов.
Жарыстың далалық кезеңі Бангкок маңындағы Ко Крет аралында ұйымдастырылды. Қатысушылар аймақтың жер пайдалану құрылымын зерттеп, туристік әлеуетін бағалау тапсырмасын орындады. Бұл сынақта да Талғат жоғары деңгей көрсетіп, әділқазылардың жоғары бағасына ие болды.
– Локациядағы практикалық тур ең күрделі кезеңдердің бірі болды. Біз 5 сағат бойы аралды зерттедік. Оның екі бөлігін салыстырып, барлық пирсті белгіледік, туристік нысандарды картаға түсірдік, өсімдіктердің таралу заңдылықтарын анықтадық. Соңында аралдың экономикалық дамуына қатысты ұсыныстарымызды ұсындық. Қазіргі уақытта ол жеткілікті дамымаған. Бұл тапсырма көп күш пен зейін талап етті, – деп атап өтті жас ғалым.
Отанға оралған жеңімпазды туған жерінде ыстық ықыласпен қарсы алды. Мемлекет басшысы Қасым-Жомарт Тоқаев оқушыларды қабылдап, олардың табандылығын ерекше атап өтті. Президенттің айтуынша, әрбір медаль – маңдай тер мен үздіксіз дайындықтың жемісі.
Сонымен қатар, жас географтың еңбегін бағалай отырып, Талғат Байбосыновқа 1 500 АЕК көлемінде сыйақы сертификаты табысталды.
Бұл жеңіс қазақстандық білім жүйесінің әлеуетін көрсететін және жас ұрпақтың ғылымға деген қызығушылығын арттыратын маңызды жетістік болып отыр.
Ералы Ғани
«QH»