Білімділер бәйгесі
Таиланд астанасы Бангкок қаласында әлемдегі ең беделді зияткерлік жарыстардың бірі International Geography Olympiad (IGeO) халықаралық олимпиадасы өз жұмысын бастады. Аталған білім сайысы биыл да жоғары деңгейде ұйымдастырылып, әлемнің 50-ге жуық елінен келген 200-ден астам дарынды оқушыны бір арнаға тоғыстырды.
Қазақстан атынан халықаралық додаға төрт оқушыдан құралған ұлттық құрама қатысып отыр. Солардың қатарында Қарағанды қаласындағы Назарбаев Зияткерлік мектебінің 12-сынып оқушысы Талғат Байбосынов бар. Ол еліміздің әр өңірінен іріктелген үздік оқушылармен бірге ел намысын абыроймен қорғауға аттанды.
География ғылымына қызығушылығы зор жастар бірнеше күн бойы білім мен біліктіліктің үш кезеңінен тұратын күрделі жарысында сынға түседі. Атап айтқанда, жарыс бағдарламасына жазбаша тест, мультимедиялық тапсырмалар және далалық практикалық тур енгізілген. Әр кезең қатысушылардан терең білім мен логикалық ойлау, кеңістіктік түсінік пен мәселелерді шешу дағдыларын талап етеді.
Талғат Байбосынов – география саласында өз қабілетімен көпшілікке танылған талантты жас. Ол 2024 жылдың сәуір айында өткен жалпы білім беретін пәндер бойынша республикалық олимпиадада география пәнінен күміс жүлдеге ие болған. Бұдан бөлек, 30 маусым мен 3 шілде аралығында Литваның Вильнюс қаласында өткен Еуропалық география олимпиадасына да қатысып, халықаралық тәжірибе жинақтаған.
Халықаралық география олимпиадасы алғаш рет 1996 жылы өткізілген. Содан бері ол Халықаралық географиялық одақтың (IGU) қолдауымен жыл сайын тұрақты түрде ұйымдастырылып келеді. Олимпиаданың басты мақсаты – мектеп оқушыларының география ғылымына, қоршаған орта мен жаһандық мәселелерге деген қызығушылығын арттыру, сондай-ақ түрлі елдің жас зияткерлері арасында өзара ынтымақтастық пен достықты нығайту.
Қазақстан бұл беделді олимпиадаға 2012 жылдан бері тұрақты қатысып келеді. Осы жылдар ішінде отандық оқушылар көптеген жүлделі орынды иеленіп, еліміздің білім саласындағы әлеуетін халықаралық деңгейде дәлелдеді. Мәселен 2024 жылы өткен олимпиадада қазақстандық команда бір күміс және үш қола медаль жеңіп алған болатын.
IGeO – жас географтар үшін жаңа көкжиектерге жол ашатын, білім мен тәжірибені ұштастыратын ірі халықаралық алаң. Осындай ауқымды додада ел намысын қорғау – әрбір жас қатысушы үшін үлкен құрмет әрі зор жауапкершілік. Талғат пен оның командаластарына алдағы сын кезеңдерінде сәттілік тілейміз.
Ералы ҒАНИ,
«QH»