Білім фестивалі
Қай оқу орнына түсуге болады? Қарағандыда жыл сайынғы Samga Fest білім фестивалі өтті. Қазақстанның жетекші жоғары оқу орындары әлеуетті студенттермен кездесті.
SAMGA FEST – университеттер мен жоғары оқу орындарының ең ауқымды білім беру фестивалі. 11 сынып оқушыларын жоғары оқу орындарына түсуге дайындауға арналған жыл сайынғы фестивалді Samga Academy ұйымдастырды. Шара жоғары сынып оқушыларын ҰБТ-ны сәтті тапсыру үшін дайындықтарын нығайтуға және Қазақстанның жетекші университеттеріне түсуге талпынысын қолдау мақсатында ұйымдастырылды.
– Бұл fеstтің мақсаты, оқушыларға өзінің мамандығын таңдау және өзінің армандаған университетін таңдауға көмек көрсету. Бүгін бізден көптеген университет болды, – деді SAMGA FEST ұйымдастырушысы Данияр Құлбаев.
SAMGA FEST 2024 бұл күнде жоғары оқу орындарына түсуге дайындалып жатқан жоғары сынып оқушыларына бағытталған. Фестиваль оларға ЖОО-ның қазіргі талаптарын білуге, емтихандарды сәтті тапсыру үшін пайдалы дағдыларды алуға және білім берудегі мақсаттарына жетуге мотивация алуға мүмкіндік берді. Фестивальге Қазақстанның жетекші жоғары оқу орындарының өкілдері қатысып, өз оқу орындары жайында 10 минуттық таныстырылым жасап, тиімді бағдарламаларын ұсынып, талапкерлердің мүмкіндіктері туралы әңгімеледі. SAMGA FEST бағдарламасында шеберлік сыныптары, интерактивті сессиялары ұйымдастырылды. Сондай-ақ, Samga Academy тәжірибелі оқытушылары кеңес берді.
– Жоғарғы оқу орындарының өкілдерімен, ЖОО-ның қандай мамандықтары бар? Және сол мамандықтарға қалай түсуге болады? ҰБТ-ның талаптары, университеттің ішкі талаптары туралы толық ақпараттар берілді. Бетпе-бет кездесу өте үлкен нәтиже береді, бұл оқушылар мен университет оқытушыларына маңызды, – деп атап өтті университет өкілі Саят Бердіғалиұлы.
Samga Academy мұндай ақпараттық бағыттағы шараларды әлі де жалғастыруды жоспарлап отыр. Және келесі жылы бұдан да көп қатысушылар қатарын асыға күтуде. Ал аталмыш фестивалға қатысу үшін, тіркелсеңіз жеткілікті, дейді SAMGA FEST ұйымдастырушылар. Бұл жағдайда қатысушының жас ерекшелігі маңызды емес. Кез келген ізденімпаз жан ниетін білдіріп, ЖОО жайында маңызды ақпаратты біле алады. Мұндай алаң оқушыларға аса пайдалы.
Айдын ЖОЛҚҰТТЫТЕГІ,
«QH»