Бағаны теңестіру – нарықты тұрақтандыру

Қазақстан Үкіметі жанармай бағасын кезең-кезеңімен көтеруге мәжбүр. Бұл қадам көрші елдермен арадағы баға алшақтығын қысқарту және жанармайдың заңсыз сыртқа шығарылуына тосқауыл қою мақсатында жасалып отыр.

Бұл туралы Премьер-министрдің бірінші орынбасары Роман Скляр Үкімет үйінде өткен баспасөз мәслихатында мәлімдеді. Оның айтуынша, отандық нарықтағы жанармай бағасы – аймақ елдерімен салыстырғанда әлдеқайда төмен. Мұндай айырмашылық арзан отынды шекара асырып тасымалдауға түрткі болып отыр.

– «Бензин мен дизель отыны бізде көрші елдерге қарағанда айтарлықтай арзан. Соның салдарынан олар бізден сыртқа кетіп жатыр – кейде контрабандалық жолмен, кейде заңды түрде. Мысалы, транзиттік көліктер арзан отынмен толтырылып алады. Сондықтан біз сыртқа кетуді болдырмау үшін бағаны біртіндеп теңестіруге мәжбүрміз», – деді Роман Скляр.

Склярдың айтуынша, Қазақстан жылына 90 миллион тоннадан астам мұнай өндірсе де, оны өңдеу деңгейі жеткіліксіз болып отыр. 2017-2019 жылдары еліміздегі үш ірі мұнай өңдеу зауыты қайта жаңғыртылғанымен, соңғы жылдары әуе отынына деген сұраныс қайта өсіп, тапшылық байқала бастаған.

Сарапшылар бұл өзгерістердің ішкі нарықты қорғауға бағытталғанын айтады. Себебі арзан отынның шекара асып кетуі отандық нарықта тапшылық туындатып, ұзақ мерзімді тұрақтылыққа нұқсан келтіруі мүмкін.

Құралай КӨБЕНОВА,

«QH»