Қазақстанда бет-әлпетті толық жабатын киімдерге тыйым салынды
Қазақстанда 2025 жылдың 12 шілдесінен бастап қоғамдық орындарда адамның бет-әлпетін толық жабатын киімдерге тыйым салатын заңнамаға өзгерістер күшіне енді. Бұл туралы ішкі істер органдарының өкілдері хабарлады.
Жаңа норма не үшін енгізілді?
Заңдағы бұл өзгерістің негізгі мақсаты – азаматтардың конституциялық құқықтары мен бостандықтарын, соның ішінде діни сенім еркіндігін шектемей, қоғамдық қауіпсіздікті қамтамасыз ету. Тәртіп сақшыларының айтуынша, адамды визуалды түрде тануға кедергі келтіретін киімдер түрлі құқық бұзушылық пен қылмыстардың алдын алуға тосқауыл болуы мүмкін. Осы себепті бұл шектеу енгізіліп отыр.
Қандай киімдерге тыйым салынады?
Тыйым адамның бет-жүзін толықтай жауып, оның тұлғасын тануға мүмкіндік бермейтін киімдерге қатысты. Олардың қатарына, мысалы, бетперде (маска), никаб, балаклава және соған ұқсас киім түрлері жатады. Бұл киімдер қоғамдық орындарда азаматты визуалды тануға айтарлықтай кедергі келтіреді.
Қандай киімдерге рұқсат берілген?
Халық арасында жиі кездесетін және діни себептермен киілетін хиджаб, шейла, химар, аль-амира сияқты киімдер бұл тыйымға жатпайды. Себебі олар адамның бет-жүзін жаппайды және тұлғаны тануға мүмкіндік береді.
Тыйым кімдерге қолданылмайды?
Жаңа норма келесі жағдайларда қолданылмайды: медициналық себептермен бетперде тағуға мәжбүр болған адамдарға, ауа райының ерекшелігіне байланысты қорғаныс киімін киген азаматтарға (мысалы, қатты аязда бет-аузын тұмшалаған адамдар), қызметтік, еңбек, азаматтық қорғаныс міндеттерін атқаратын тұлғаларға, спорттық және мәдени шараларға қатысушыларға.
Қазіргі уақытта учаскелік полиция инспекторлары тұрғындар арасында белсенді түрде түсіндіру жұмыстарын жүргізуде. Олар азаматтарға заңнамадағы жаңа талаптарды түсіндіріп қана қоймай, құқық бұзушылықтардың алдын алу шаралары жөнінде ақпарат беруде. Сонымен қатар, полицейлер интернет-алаяқтыққа байланысты да кеңес берді. Олар адамдардың жиі кездесетін алдау түрлері туралы ескертіп, алаяқтардың қандай тәсілдер қолданатынын және мұндай жағдайлардан қалай сақтануға болатынын түсіндірді. Бұл заңнамадағы өзгерістер қоғамның қауіпсіздігін арттыруға, құқық бұзушылықтардың алдын алуға бағытталған. Билік өкілдері бұл шектеулер азаматтардың діни құқықтарын шектемейтінін баса айтып отыр. Жаңа талаптар сақталуы тиіс, ал полицейлер заң талаптарының орындалуын қадағалайтын болады.
Жұпар АМАНБАЙҚЫЗЫ,
«QH»