Қауіпке қарсы дайындық
Қарағанды облысында табиғи апаттар кезінде әрекет етуге арналған ауқымды оқу-жаттығу шарасы өткізілді. «ЖЕР-2025» атты республикалық командалық-штабтық оқу-жаттығу барысында мамандар екі күн бойы сейсмикалық қауіпті аймақтарда болуы мүмкін жойқын жер сілкінісінің салдарын жою бойынша тәжірибе жинақтады. Шараның негізгі мақсаттары мен міндеттері арнайы брифингте түсіндірілді.
Еліміздің барлық өңірінде ауқымды оқу-жаттығулар өтіп жатыр. Азаматтық қорғау саласындағы бұл шаралар төтенше жағдайларға дайындықты пысықтауға бағытталған. Негізгі басқару штабы Шымкент қаласында шоғырланып, бірнеше облыстан арнайы күштер осы жерге тартылды. Ал басқа аймақтар, оның ішінде Қарағанды облысы да, құтқару бөлімшелерін жұмылдыру, халықты эвакуациялау және уақытша орналастыру бекеттерін ашу бағытында іс-қимылдарды жаттықтыруда. Мұндай оқу-жаттығулар барлық қызметтің үйлесімді жұмысын тексеріп, өзара әрекет ету алгоритмдерін жетілдіруге мүмкіндік береді.
– Оқу-жаттығудың негізгі мақсаты – еліміздің сейсмикалық қауіпті аймақтарында орын алуы мүмкін жойқын жер сілкіністерінің салдарын жоюға дайындықты пысықтау. Сонымен қатар, азаматтық қорғаныс күштері мен құралдарының әзірлік деңгейін бақылау органдары арқылы тексеру көзделіп отыр. Шараның негізгі штабы Шымкент қаласында орналасқан. Осы өңірге Түркістан, Қызылорда, Жамбыл облыстары мен Шымкент қаласынан тиісті күштер мен техника жұмылдырылуда. Оқу-жаттығу барысында авариялық-құтқару және барлау жұмыстарын жүргізу, халықты қауіпсіз жерге көшіру, тұрақты байланыс арналарын ұйымдастыру, сондай-ақ зардап шеккендерді уақытша орналастыру секілді маңызды шаралар жүзеге асырылады, – деді Қарағанды облысы ТЖД төтенше жағдайлардың зардаптарын жою басқармасының бастығы Нұржан Жақатаев.
Қарағанды облысында төтенше жағдайларға дайындықты арттыру мақсатында 30-дан астам практикалық шара өткізу көзделіп отыр. Жаттығулар барысында техниканы теміржол мен әуе көліктеріне тиеу, арнайы колонналарды жөнелту, эвакуацияланған азаматтарды қабылдау және шатырлы лагерьлерді орнату секілді нақты жұмыстар жүзеге асырылады. Облыс орташа сейсмикалық аймақта орналасқанына қарамастан, өнеркәсіптік нысандардың көптігі өңірде қауіпсіздік мәселесіне ерекше мән беруді қажет етеді. Оқу-жаттығулар ықтимал қатерлерді бағалауға және төтенше жағдайлар кезінде іс-қимыл алгоритмдерін жетілдіруге бағытталған.
– Еліміздің түрлі өңірінде, оның ішінде Қарағанды облысында да азаматтық қорғау қызметтерінің дайындығын пысықтау жұмыстары жүргізілуде. Жаттығу аясында облыстық құрылымдарды жедел әзірлікке келтіру, оларды шартты төтенше жағдай орындарына жіберу, сондай-ақ инженерлік арнайы және қосалқы техникаларды теміржол платформаларына тиеу бойынша шаралар атқарылады. Бұдан бөлек, зардап шеккен халықты қабылдауды ұйымдастыру, тіршілікті қамтамасыз ету элементтерін орналастыруға байланысты имитациялық іс-қимылдар жүзеге асырылады. Бұл оқу-жаттығулар түрлі қызметтің өзара іс-қимылын жетілдіріп, төтенше жағдайларға шұғыл әрекет етуге дайындықты арттыруға бағытталған, – дейді Нұржан Жақатаев.
Бекітілген жоспарға сәйкес, жойқын жер сілкінісі орын алған жағдайда Қарағанды облысының Төтенше жағдайлар департаментінің күштері Шымкент қаласының Қаратау ауданына көмекке жіберілетін болады. Қазіргі таңда өңірде 2 000-нан астам маман мен 500-ден аса арнайы техника бірлігі жоғары дайындық режимінде тұр. Бұл күштер кез келген сәтте төтенше жағдай аймағына аттанып, құтқару және қалпына келтіру жұмыстарын бастауға әзір.
Қанағат ЖИЕНҚҰЛОВА,
«QH»